Косово планира да започне локално производство на албанското оклопно возило „Шота“ во соработка со Албанија и Хрватска, што, според официјалните лица, би бил првиот заеднички проект за производство на оклопни возила на Балканот.
Вршителот на должноста министер за одбрана на Косово, Ејуп Маќедончи, потврди дека се водат разговори со Албанија за финализирање на билатерален договор, кој потоа би се проширил и на Хрватска. Во интервју за емисијата „60 минути“, кое го емитуваше порталот Коха, Маќедончи рече дека партнерите во принцип се согласиле за заеднички развој и производство на возила.
Според него, производството би било географски распределено, поединечните компоненти би се произведувале во различни земји. Доколку проектот се реализира, тоа би бил прв случај три балкански земји заеднички да произведат воено оклопно возило, наменето за нивните национални вооружени сили и извозни пазари.
Иницијативата се темели на договорот за соработка во одбраната и безбедноста што Косово, Албанија и Хрватска го потпишаа во март во Тирана, што остава можност за вклучување на дополнителни земји во подоцнежна фаза.
Договорот за одбрана меѓу трите земји предизвика остри критики од Србија, која тврди дека го крши регионалниот договор за контрола на оружјето од 1996 година и Резолуцијата 1244 на Советот за безбедност на ООН. Белград тврди дека, според таа резолуција, КФОР останува единствената овластена вооружена сила во Косово.
Извор: vecer.mk
