Министерството за здравство на Италија денеска соопшти дека 17 од 27-те најголеми италијански градови за два дена ќе бидат во црвена фаза на аларм поради горештините, како и дека топлотниот бран што ја мачи земјата дополнително ќе се засили.
Нивото на аларм во моментов е на максимум во 15 градови, пренесува Анса.
Во црвена фаза на аларм денеска се Анкона, Болоња, Болцано, Бреша, Фиренца, Фрозиноне, Милано, Перуџа, Пескара, Риети, Рим, Торино, Верона, Венеција и Витербо.
Латина ќе биде во црвено во среда, а Бари ќе им се придружи на градовите со максимален степен на аларм во четврток, со што вкупниот број ќе се зголеми на 17.
Системот за алармирање на Министерството за здравство има три нивоа покрај нултото, зеленото, кое означува дека нема аларм, потсетува Анса и додава дека првото ниво, жолтото, е таканаречен пред-аларм, додека второто ниво, портокаловото, значи дека температурите и временските услови можат да претставуваат здравствени ризици, особено за ранливите групи како што се постарите лица и болните.
Третото ниво, црвеното, значи дека горештините претставуваат ризик по здравјето на целата популација, а не само на ранливите групи.
Високите температури парализираа добар дел од Западна Европа, во Франција починаа околу 20 лица, а на удар се Италија, Велика Британија, Шпанија, Германија…
Извор: vecer.mk
