Му се извинувам на мојот пријател и неговото семејство за предизвиканата штета само поради мојата професија – пишува вицепремиерот на Фејсбук и не негира дека „аудиото” (кое се води на име на пријателот) го користел тој
Од МВР претходно за „360 степени“ рекоа дека лицето што пријавило во полиција е сопственикот Б.Л. и дека немаат сознанија за поврзаност на возилото со Груби
По веста за опожареното возило во скопската населба Чаир со објава на Фејсбук се јави првиот вицепремиер Аратн Груби, во која не демантира дека тој приватно го користел „аудиото”, иако се води на име на друго лице. Во постот, Груби вели дека станува збор за негов пријател.
Вицепремиерот признава и дека инцидентот е порака до него.
„Им се извинувам на сите мои соседи во мојата населба за големото вознемирување синоќа пред нашата зграда само поради мојата професија. Исто така, му се извинувам на мојот пријател и неговото семејство за предизвиканата штета само поради мојата професија. Во политиката сум за да служам и да оставам трага со работа и дела, а не да ми се тероризира семејството, соседите и пријателите”,
пишува Груби.
Нападите, како што вели, смета дека се резултат на неговата работа.
„Континуираните закани и последователни напади ги сметам за кукавички и подмолни, но немам намера да запрам и да престанам да работам и да ги исполнувам очекувањата на граѓаните. Се извинувам што мојата и вознемирувањето на моето семејство се претвори и во грижа и вознемиреност и на соседите и на пријателите. Изразувам благодарност до сите мои соседи како и до безбедносните сили и нивните напори да го решат синоќешниот напад”,
вели вицепремиерот.
Претходно, во полицискиот билтен беше објавено дека „денеска (22.7.2023) во СВР Скопје е пријавено дека околу 03.30 часот на ул. ‘Струмичка’ настанал пожар во патничко возило ‘ауди’ со скопски регистарски ознаки, сопственост и паркирано од Б.Л. (35) од Скопје”.
Откако ТВ Алсат, а потоа и други медиуми, објавија дека иако е на друго име, автомобилот приватно го користи Груби, „360 степени” се обрати до МВР со прашање за поврзаноста на инцидентот со првиот вицепремиер.
Од МВР за „360 степени“ рекоа дека лицето што пријавило во полиција е сопственикот на возилото Б.Л. и дека немаат сознанија за поврзаност на возилото со Груби.
ИЗВОР: 360stepeni.mk
