Македонија треба да врати 2,2 милиони евра проневерени од програмата Еразмус плус, како што најави ОЛАФ. Тоа ќе биде за некои 30-45 дена и за тоа треба да разговараме со Владата, која е техничка па не може да прави ребаланс, но ќе морада се најдат средства, вели Марко Ѓоргиевски, претседател на Националната агенција за европски образовни програми и мобилност, во СТУДИО 10 на ТВ 24.
– Информацијата што стигна од ОЛАФ е дека станува збор за 21 проект во вредност од 2,2 милиони евра, но нам не ни се познати деталите од истрагата на ОЛАФ. Тие во 2022 година дошле во Македонија, но ја немаат посетено нашата агенција каде сум директор од 2020 година, вели Ѓоргиевски.
Ѓоргиевски вели дека во Агенцијата дошол во сензитивен период и во изминатите три години воспоставиле нови критериуми и благодарение на тоа и на помошта од Амбасадата на ЕУ, програмата за образовна размена ќе продолжи. Тој вели дека сите документи се предадени до Јавното обвинителство.
– Јас се обидов да не посочувам со прст кон никого, за тоа постојат истрашни органи. Ние треба успешно да ја спроведуваме Еразмус плус со помош на евроамбасадорот. Немам информација дека претходната директорка Лидија Димова ги замрзнала овие предмети, знам дека ние замрзнавме 5 други проекти, вели Ѓоргиевски инсистирајќи дека постапката во ОЈО е во предистражна фаза и станува збор за случаи од периодот од 2016 – 2020 година.
Ѓоргиевски вели дека и во други земји низ Европа се случуваат вакви работи и средствата се враќаат, а потоа националните обвинителства ја спроведуваат истрагата.
– Од 2008 година постои Агенцијата, а Еразмус програмата е од 2014 година. Сега со Еразмус плус имаме 7,7 милиони евра за програми. Нам ни даваат средства но ни даваат и процедури. За почитување на процедурите имаме 70 евалуатори, евалуациона комисија, а ако било се во ред се дава решение за користење. Секоја година ние правиме семинари за обука и како да се аплицира и оттука имаме секоја година се повеќе апликанти, вели Ѓоргиевски.
Тој додава дека за Македонија е многу битна оваа програма на сите нивоа на образование со цел да ги искористиме информациите и искуствата од европските земји.
Извор: 24vesti.mk
