Во општина Чаир денеска беа претставени крупни инфраструктурни проекти кои имаат за цел да го решат хроничниот сообраќаен хаос и да обезбедат подобри услови за граѓаните. Кандидатот за градоначалник на Скопје, Орце Ѓорѓиевски, нагласи дека овие проекти се дел од неговата визија за рамномерен развој на градот.
Главниот проект е проширувањето на булеварот „Цветан Димов“, главна сообраќајна артерија која го поврзува Чаир со центарот на градот. Според планот, булеварот ќе има шест коловозни ленти, велосипедски патеки, тротоари, зеленило и современо осветлување. Ѓорѓиевски истакна дека сообраќајниот метеж на овој потег, каде дневно се движат околу 100.000 возила, ќе биде значително намален, а безбедноста за учесниците во сообраќајот подобрена.
Паралелно, започнува и изградбата на монтажна катна гаража кај ТЦ „Чаирчанка“, со цел да се реши драматичниот недостиг на паркинг места во овој густо населен дел од општината. Новата гаража ќе обезбеди брзо, функционално и безбедно решение за паркирање, што ќе го растовари сообраќајот и ќе ја подобри урбаната инфраструктура.
Ѓорѓиевски потенцира дека овие проекти се дел од стратегијата „Визија: Нула несреќи“, со која до 2030 година се предвидува редизајн на 50 критични улици и крстосници во Скопје, во согласност со европските стандарди за урбана безбедност.
„Со овие проекти ја потврдуваме визијата за еднакво развиен град, каде секоја општина добива инфраструктура достојна за современо живеење“, изјави Ѓорѓиевски, додавајќи дека рамномерниот регионален развој е клучна насока за иднината на Скопје.
