Да се елиминираат поделбите во надлежностите на градот особено во сферата на урбанизмот и да се одвојат посебни локации за развој на бизнисот во Скопје, порача претседателот на Комората Азески. Тој даде и одредени предлози во идниот развој на градот.
„Да се видат оптималните можности на Скопје, за понатамошен развој, затоа што, ние ако вака продолжиме со ширење на градот практично ќе ја донесеме цела Македонија тука, особено од аспект на бизнисот. Ние уште на првата средба разговаравме со господинот Ѓорѓиевски за едно решение да покрај кејот на Вардар се направи некаква железница со која што луѓето ќе се растеретат“, истакна Бранко Азески.
Ѓорѓиевски пак рече дека потребно е Скопје да се изгради во економски стабилен град и дека со бизнисот ќе има тесна соработка.
„Она што е мој приоритет е да создадеме силно и економски стабилно Скопје, кое што ќе граби напред, Скопје каде што ќе се утврдат потенцијалите негови не за две, за три, за пет, туку за многу повеќе години. Многу е важно ние да имаме економска стратегија за развивање на нашиот главен град, да имаме силно стопанство од една страна, но од друга страна да имаме нови добро платени работни места во градот Скопје“, вели Орце Ѓорѓиевски.
Ѓорѓиевски говореше и за дивоградбите во Скопје за кои рече дека е потребно институционално справување со нив, а истакна и дека деталните и генералните урбанистички планови треба да бидат подостапни до граѓаните за да знаат што ќе се гради.
ИЗВОР: ТВ 21
