Генералниот секретар на ОН, Гутереш, се сретна со израелскиот претседател Херцог

ЊУЈОРК (АА) – Генералниот секретар на Обединетите нации (ОН), Антонио Гутереш, се сретна со израелскиот претседател Исак Херцог, јавува Анадолу.

Канцеларијата на портпаролот на ОН соопшти дека тие се сретнале во зградата на ОН во Њујорк.

Гутереш ја повтори поддршката за решението за две држави и нагласи дека треба да се избегнуваат чекори што ќе го поткопаат овој процес.

„Генералниот секретар ги осуди сите акти на тероризам и нагласи дека антитерористичките операции мора да се спроведат во согласност со меѓународното хуманитарно право и меѓународното право за човекови права“, се наведува во соопштението.

Гутереш ги осуди сите форми на антисемитизам.

Херцог дојде во Њујорк по средбата со американскиот претседател Џо Бајден во Вашингтон, каде што беше во официјална посета.

Хасидските Евреи во Њујорк одржаа протест за време на средбата на Херцог со градоначалникот на Њујорк, Ерик Адамс.

Собрани во Градското собрание, демонстрантите развеаја транспаренти со пораки како: „Слободна Палестина“, „Библијата бара цела Палестина да биде под палестински суверенитет“, „Јудаизмот го отфрла ционизмот“ и „Херцог не е добредојден овде“.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS)..