Гаранции од ЕУ, па Бугарите во уставот. Ова во изјава, за Дојче Веле, од Берлин го порача претседателот на Собанието Африм Гаши. За тоа, дали Германија ќе се вклучи како олеснувач меѓу Скопје и Софија, откако предлогот на Виктор Орбан беше ескпресно одбиен од Бугарија – Гаши порачува дека секоја помош е добредојдена.
– Ние сме подготвени Бугарите во Уставот да ги вметнеме веднаш. Мислам дека имаме целосен или поконкретно голем консензус околу тоа дека немаме никаков проблем со тоа Бугарите да бидат дел од Уставот. Но, нашиот проблем е со предвидливоста на процесот, и гаранциите дека веднаш потоа ќе нема следно прашање или следен услов кој се однесува на историски и идентитетски прашања кои мислиме дека се тешко решливи на политичките маси на преговарање. Африм Гаши претседател на Собрание.
Според Гаши, владата нема дилеми за европскиот пат и сака процесот да продолжи што побрзо. Вели дека на Илинденска бр 2 сите заеднички го бранат македонскиот идентитет, а рокот од шест месец за уставните измени, никогаш не бил поставен во контекст за напуштање на владината коалиција.
Од СДСМ пак порачаа дека владата нема јасна стратегија како понатаму. Лидерот на опозицијата Венко Филипче, на средба со евроамбасадорот Михалис Рокас, понудил поддршка за евроинтеграциите.
– Она што загрижува е фактот дека актуелната власт нема јасна стратегија како понатаму, кои се следните чекори и дали воопшто има политичка волја за продолжување на процесот на интеграција. – СДСМ.
Во меѓувреме премиерот Мицкоски се уште е во дилема дали ќе го испраќа писмото до европските институции и челници. Изјави и дека од Берлин се вратил како поголем оптимист и дека оптимизмот е од новите иницијативи кои ги слушнал од средбите со германските официјални претставници.
– Посредништво, состаноци се можни. Мислам дека се очекува еден таков состанок, со посредништво на Орбан во Будимпешта во ноември. Разговори ќе има, но мислам дека политичкиот консензус е прилично голем во Бугарија, по ова прашање. Мислам дека тие не би влегувале во еден таков ризик, да ја менуваат преговарачката рамка. Сметам дека е невозможно. – Димитар Николовски Евротинк.
Следната недела, во земјава, се очекува да пристигне и шефицата на ЕК Урсула фон дер Лајен. Според нејзината агенда, во Скопје се очекува да има средби со премиерот Мицкоски, но и со претседателката Сиљановска Давкова.
– Можеме да очекуваме повторување на истите аргументи – дека се потребни измени. Меѓутоа мислам дека многу повеќе оваа посета ќе биде искористена за Планот за раст и за реформската агенда. – ели Николовски.
Пред само 5 дена, од Берлин пристигна студен германски туш. Шефицата на германската дипломатија Аналена Бербок порача – се додека во Европската Унија се одлучува едногласно, Македонија ќе мора да ги почитува компромисите и да ги вметне Бугарите во уставот, за да ги почне преговорите со ЕУ.
Извор: 24vesti.mk
