ИСТАНБУЛ (АА) – Франција ја повика Европската комисија итно да го преиспита Договорот за асоцијација меѓу Европската Унија (ЕУ) и Израел, повикувајќи се на влошената хуманитарна состојба во Појасот Газа и сомнежите околу почитувањето на човековите права од страна на Израел, јавува Анадолу.
Францускиот министер за надворешни работи Жан-Ноел Баро изјави дека потребно е да се преиспита партнерството меѓу ЕУ и Израел, имајќи ја предвид улогата на Израел во блокирањето на хуманитарната помош за Газа.
Тој ги даде овие изјави во момент кога кризата во енклавата се продлабочува, а жителите на Газа се соочуваат со недостиг на храна, вода и медицински средства,.
„Ова е легитимно барање и ја повикувам Европската комисија да го испита“, рече Баро.
Тој нагласи дека договорот за асоцијација меѓу ЕУ и Израел е заснован на принципите на човековите права и демократијата и праша дали тие принципи во моментов се почитуваат.
На прашањето дали Франција го поддржува суспендирањето на договорот, Баро одговори: „Да видиме каква анализа ќе направи Европската комисија за усогласеноста на Израел со член 2 од договорот“.
Баро остро го критикуваше пристапот на Израел кон хуманитарната криза во Газа.
„Мислам дека мора да ја изразиме реалноста со зборови. Реалноста е дека Палестинците во Газа гладуваат, жедни се, немаат ништо и дека Газа денес е на работ на хаос и глад“, рече тој.
„Мислам дека сите се свесни за ова“, додаде тој, опишувајќи го ставот на Израел како „неразбирлив“.
„И токму со јасно изразување на нашето мислење, несомнено можеме да се надеваме дека ќе влијаеме на израелската позиција“, заклучи Баро.
Неговите коментари следуваат по повикот на Холандија за итна ревизија на договорот меѓу ЕУ и Израел и ги одразуваат растечките поделби во рамките на блокот од 27 члена.
Неколку земји, вклучувајќи ја Шпанија и Ирска, веќе изразија поддршка за суспензија на договорот, додека други членки сè уште се воздржани.
Претходно оваа недела, шефицата за надворешна политика на ЕУ, Каја Калас, изјави дека Брисел му понудил помош на Израел за дистрибуција на хуманитарна помош во Газа.
Договорот за асоцијација меѓу ЕУ и Израел е потпишан во 1995 година и е во сила од 2000 година. Тој ги регулира трговските и политичките односи меѓу двете страни, при што член 2 предвидува дека односите мора да се темелат на почитување на човековите права и демократските принципи.
Извор: Anadolu Agency (AA)
