Протестот беше инициран од политичката партија на српското малцинство во Косово, Српска листа, а нејзиниот претседател Горан Ракиќ на денешниот протест порача дека оти на северот на Косово продолжува „диктаторкскиот режим на косовскиот премиер Албин Курти“
Во местото Штрпце во Косово денеска се одржа протест на косовските Срби откако на 6 јануари во селото Готовуши беа ранети двете српски момчиња Стефан Стојановиќ (11) и Милош Стојановиќ (21), а по еден ден во Клокот беше претепан и 18-годишниот Стефан Томиќ додека се враќал од божиќната литургија.
Според организаторите на протестот, тој се одржува по „континуираното угнетување на Србите во Косово“.
Протестот беше инициран од политичката партија на српското малцинство во Косово, Српска листа, а нејзиниот претседател Горан Ракиќ на денешниот протест порача дека оти на северот на Косово продолжува „диктаторкскиот режим на косовскиот премиер Албин Курти“.
Тој изјави и дека Курти играл толку силно, мислејќи дека Србите ги тргнале барикадите зашто што се плашеле.
„Неговата цел е да создаде такви услови Србите да ги напуштат своите домови. Нашата борба преку мирни и демократски средства и нашата хармонија се нашето најсилно оружје за отпор против антисрпскиот диктаторски режим на Курти. Верувајте ми, ако сме обединети, сигурно ќе победиме“,
рече тој и им порача на Србите дека не треба да се предаваат.
Protest u Štrpcu povodom napada i ranjavanja srpskih mladića pic.twitter.com/1W27qdWhoL
— Kosovo Online (@KosovoOnline) January 8, 2023
Денешниот протест ден претходно го најави градоначалникот на општина Штрпце Далибор Јевтиќ, и потпретседател на Српската листа. Тој во обраќањето пред насобраната толпа рече дека испраќа порака за мир, но дека испраќа порака и до оние кои сакаат да ги протераат Србите – дека „нема да им успее“.
Тој на граѓаните им ги пренесе поздравите од „хероите Милош и Стефан“, кои, како што рече, покажале дека не се предаваат дури и кога се пука во нив.
„Наместо да го славиме празникот во мир, моравме да протестираме против пукањето врз српските деца и млади луѓе. Денеска од ова место испраќаме порака дека нема да бидеме заплашени. Секој од нас е Стефан и Милош, а пораката до оние кои сакаат да не избркаат е дека не успејаа во тоа“,
рече Јевтиќ.
Тој и порача на меѓународната заедница „да го вразуми Курти“, да престане да ги напаѓа српските деца, бидејќи, како што рече, српскиот народ ќе опстане без оглед на сите предизвици.
Во меѓуврме, додека денеска во Штрпце се одржуваше протестот, во Основниот суд на Урошевац се одржа затворена судска седница на која беше сослушан 33-годишниот Азем Куртај, осомничен за ранувањето на двете момчиња од српска националност врз кои беше пукано од возило во движење на 6 јануари.
Сослушувањето било затворено за медиумите, а од Судот информирале дека донесената одлука ќе биде соопштена преку писмено соопштение.
По седницата, адвокатот на осомничениот, Наим Ферати, изјавил дека неколку секунди пред инцидентот кој се случи пред два дена, Куртај бил нападнат со некој предмет и бил навредуван, по што пукал во самоодбрана.
По инцидентот во Штрпце реагираа претседателката на Косово Вјоса Османи и премиерот Албин Курти, а осуда за нападот стигна и од други меѓународни претставници.
Извор: 360stepeni.mk
