Во моментов во тек е 30-минутното излагање на премиерот Димитар Ковачевски кој го образложува предлогот. По него ќе се обратат пратениците што се пријавени за збор
Во салата „Борис Трајковски“ во Собранието, со задоцнување од 20-ина минути, претпладнево почна седницата на Комисијата за уставни прашање на која треба да се расправа за промена на Уставот.
Во Собранието, како претставник на Владата која ги предлага уставните измени, е премиерот Димитар Ковачевски, кој дојде во друштво на вицепремиерот за европски прашања Бојан Маричиќ министерот и заменик-министерката за правда Кренар Лога и Викторија Аврамовска-Мадиќ.
Присутни се и пратениците од ВМРО-ДПМНЕ од чии редови Александар Николоски, кој е и потпретседател на опозициската партија, непосредно пред стартот на седницата порача дека тие нема да гласаат за уставните измени.
„Има денови за историја! Ова е еден од нив! ВМРО-ДПМНЕ нема да дозволи газење на македонскиот национален идентитет, негирање на македонската историја и култура. Денес во Собрание ќе гласаме ’против’ уставни измени! ’Не’, за уцени и негирања! Кај оваа генерација на ВМРО-ДПМНЕ уцени не поминуваат!“,
порача Николоски на социјалните мрежи пред да влезе во салата.
По усвојувањето на дневниот ред со 10 гласа „за“ и седум „против“ од страна на членовите на Комисијата, седницата започна.
Во моментов во тек е 30-минутното излагање на премиерот Димитар Ковачевски кој го образложува предлогот. По него, ќе се обратат пратениците кои се пријавени за збор.
Во предлог-иницијативата за уставни измени што ја усвои Владата се предлага бугарскиот и уште пет други народи да се додадат во Преамбулата од Уставот. Во Преамбулата на македонскиот Устав треба да влезат и хрватскиот, црногорскиот, словенечкиот, еврејскиот и египќанскиот народ.
Покрај овие, предвидена е уште една уставна измена во однос на составот на Комитетот за односи меѓу заедниците со која се предвидува да се измени бројот на членовите, и тоа наместо досегашните 19 члена, бројот да се зголеми на 43 члена, при што 16 члена од редот на пратениците во Собранието Македонци и Албанци и по еден член од редот на пратениците Турци, Власи, Роми, Срби, Бошњаци, Бугари, Хрвати, Црногорци, Словенци, Евреи и Египќани.
По однос на оваа точка, Комисијата за уставни прашања треба да расправа најмногу 10 дена. Со оглед на тоа што 2 август е неработен ден, а за 27 јули е закажана седница за пратенички прашања, соопштија од Собранието, работата на ова тело се очекува да заврши помеѓу 7 и 9 август.
На 18 август, пак, предлог-уставните амандмани ќе се најдат пред пратениците на пленарна седница.
ИЗВОР: 360stepeni.mk
