Според бугарските истражни органи, крајната дестинација на мигрантите се главно Велика Британија, Германија и Франција. За транспортот плаќаат околу 6-7 илјади евра. Дел од оваа сума земаат и бугарските канал-оператори. Возачите добиваат само 100 евра по превезен мигрант. Организаторот наплаќал помеѓу 500 и 1 000 евра по лице. Групата сама ги подготвувала скривниците во камионите кои биле обложувани со фолија која не дозволува рендгенските зраци од уредите на царинските служби да ја детектираат топлината на телата на лицата што се превезуваат, пишува БНТ
Бугарските истражни органи до овој момент поднесоа обвиненија против шестмина членови на организирана криминална група одговорна за смртта на 18 мигранти – авганистански државјани кои вчера беа пронајдени мртви во камион во близина на село во Бугарија. Меѓу обвинетите за случајот кој бугарските медиуми го нарекоа „камион ковчег“ е организаторот на групата на кого му е одреден 72-часовен притвор, соопштија денеска претставници на бугарското обвинителство.
Двајца од обвинетите – возачот и неговиот помошник се обвинети за предизвикување смрт од невнимние на повеќе од едно лице, пренесува бугарската национална телевизија (БНТ)
По еден член на криминалната група сè уште се трага и по него е распишана меѓународна потерница бидејќи, според истражните органи, тој вчера ја напуштил Бугарија откако веста за случајот беше објавена во медиумите.
Ова на заедничката прес-конференција денеска го истакнаа Борислав Сарафов, заменик-главен обвинител за истрага, Христо Крастев, портпарол на софиското обвинителство, и Асен Меџидиев, в. д. министер за здравство. На брифингот учествуваше и главниот обвинител на Бугарија, Иван Гешев.
Според резултатите од истрагата, мигрантите починале како последица од задушување поради стискање и туркање во скривалиштето на камионот. Тие починале бавно и болно.
Гешев на почетокот на брифингот изјави дека вчера Бугарија повторно станала дел од црната статистика на Европа. Тој во оваа прилика упати и критики до бугарските институции и обвини поранешни функционери за нивното уништување, пренесува БНТ.
„Она што го видовме – овие 18 мртви млади луѓе и многу други жртви, се резултат на распадот на институциите, на војната меѓу институциите, на уништувањето на МВР од страна на поранешен министер за внатрешни работи, на одредени т.н. наречени политички одлуки кои некои ги нарекуваат реформи во правосудството. Го затворија најсериозното средство за борба против организираниот криминал – специјализираното обвинителство. Резултатите се видливи“,
рече Гешев и праша дали некој ќе им се извини на бугарските граѓани за тоа.
Во изминатите 24 часа, како што соопшти Сарафов, биле направени десетици разговори со сведоци, извршени биле над 20 претреси и биле издадени над 30 наредби за вештачења и за дел од нив резултатите се веќе готови. Назначени се над 30 вештачења, а резултатите од некои од нив се веќе готови.
„За 24 часа успеавме да ја утврдиме целата криминална активност на оваа група“,
рече Сарафов.
Според него, истрагата била насочена не само на околностите за смртта на мигрантите туку и на откривање и документирање на активностите на криминалната група која го вршела транспортот на мигрантите.
„Станува збор за организирана криминална група која врши траснпорт со преземање мигранти од границата со Турција, која многу лесно се минува, а потоа преку разни средства ги пренесува до подрачјето околу границата со Србија. Точните локации каде да се земат мигрантите и каде да се однесат, шефот на групата ги добива од апликацијата ‘Телеграм’“,
рече Сарафов.
Крајната дестинација на мигрантите се главно Велика Британија, Германија и Франција. За нивното поминување плаќаат околу 6-7 илјади евра. Дел од оваа сума земаат и бугарските канал-оператори. Возачите добиваат само 100 евра по превезен мигрант. Менаџерот наплаќал помеѓу 500 и 1 000 евра по лице. Групата сама ги подготвувала скривниците во камионите кои биле обложувани со фолија која не дозволува рендгенските зраци од уредите на царинските служби да ја детектираат топлината на телата на лицата што се превезуваат.
Бугарското Министерство за внатрешни работи вчера информираше дека во напуштен камион во бугарското село Локорско, во околината на Софија, се пронајдени тела на осумнаесет лица, меѓу кои и едно дете.
Камионот бил натоварен со 52 мигранти од Авганистан. Тие биле набиени во засолниште изградено на дното на возилото. Во случајот се повредени 34 други лица меѓу кои и пет деца. Тие биле пронајдени прегладнети, влажни и премрзнати, по што веднаш биле хоспитализирани.
Извор: 360stepeni.mk
