Животни настрадаа во пожарите на Родос кои денеска повторно земаат замав. Повеќе медиуми јавуваат дека се угинати елените од видот Дама-Дама, кој е заштитен вид и живее во чемпресова и борова шума.
Противпожарната бригада и волонтерите се борат да спречат пожарот да навлезе во селата Генади и Вати, во јужен Родос. Во областа се упатиле неколку противпожарни возила и доброволци, додека од противпожарните авиони се фрла вода. Одлучено е двете села да се евакуираат. Продолжува гасењето и во селото Асклипио, каде што утрово повторно се разгоре жариштето.
Странските медиуми јавуваат дека туроператорите денеска превезле повеќе од 2 000 туристи дома, што според грчката влада е најголемата евакуација што некогаш била преземена во земјата.
Повеќе летови за репатријација се најавени за денеска и утре бидејќи пожарите се надвор од контрола, а управата за цивилна заштита предупреди дека заканата од дополнителни пожари е голема во речиси секој дел на Грција зафатен од топлотен бран.
Огнот денеска изгоре и дрвја и ниска вегетација во областа Киотари.
Пожарите што горат од средата на Родос принудија вкупно 19 000 луѓе да ги напуштат домовите и хотелите во текот на викендот, бидејќи пеколот стигна до крајбрежните одморалишта на југоисточниот дел на островот. Шумски пожар доведе и до евакуација на островот Крф.
„Во следните неколку недели мораме да бидеме во постојана готовност. Во војна сме, ќе го обновиме она што го изгубивме, ќе ги обештетиме оние кои беа повредени“,
изјави грчкиот премиер Киријакос Мицотакис во парламентот.
Извор: 360stepeni.mk
