По нешто повеќе од три часа битка, српскиот тенисер Новак Ѓоковиќ со резултат 3:0 во сетови (7:6; 6:3; 7:5) го победи Норвежанецот Каспер Руд во финалето на „Ролан Гарос“, со што и официјално стана најдобриот играч на сите времиња во тенис, освојувајќи го рекордниот 23. Грен Слем пехар
Ѓоковиќ лошо го започна финалниот натпревар, но брзо се консолидираше и стигна до водство во првиот сет, кој воедно беше и најдолг, односно траеше околу еден час и дваесетина минути. Потоа, рутински, ги освои и следните два сета и го освои турнирот во Париз, Франција. Со денешната победа, Ѓоковиќ се запиша во историјата на тенисот бидејќи ја освои 23. Грен Слем титула во неговата кариера, со што изби на врвот на „белиот спорт“. Зад него, со 22, односно со 20 титули остануваат Рафаел Надал и Рожер Федерер, но засега изгледа дека врвот е недостижен бидејќи Надал најави пензија, додека, пак, Федерер е одамна пензиониран.
Ѓоковиќ стана најстариот освојувач на „Ролан Гарос“, а пехарот го подигнува по трет пат. Воедно, тој е на добар пат да ги освои сите 4 Грен Слем титули во една година, бидејќи зимава го освои Австралија опен, а до крајот на календарската година му преостануваат уште Вимблдон и Американ Опен.
Со оваа победа, Ѓоковиќ се врати и на водечката позиција на АТП-листата, каде што досега беше неговиот опонент во полуфиналето, Карлос Алкараз.
ИЗВОР: 360stepeni.mk
