Фондот за здравство нема да го покрие третманот во странска болница на 19-годишниот Јани Иванов од Неготино. Оттаму и денеска го повторија ставот дека тоа е рехабилитација, а законот не дозволува поинаку, освен Фондот да покрива рехабилитации само во земјава.
Ова доаѓа откако пред една недела, премиерот Мицкоски рече дека за случајот разговарал со новиот директор на Фондот Сашо Клековски и им вети на родителите дека состојбата ќе се реши. Од Фондот практично го потврдија она образложение, со кое родителите беа одбиени за државен третман во странство.
„Со Јани Иванов ќе се постапи исто како и со Леонид Индов, кој откако се врати од Виена, веќе е на рехабилитација во болницата „8 Септември“ во Скопје. Во меѓувреме, набавена е нова опрема и квалитетот на рехабилитацијата е на повиоко ниво од претходно.“
Родителите на Јани се незадоволни од ваквиот епилог. Тие потсетуваат дека нивниот син веќе лежел во домашни институции и наместо да напредува, тој добил огромна декубитна рана на грбот од несоодветните душеци. Тоа било и причината да го однесат на третмани во соседна Грција. Сега, кога донациите, со кои се покриваше скапото лекување таму, се при крај, родителите стравуваат дека нивниот син ќе назадува во лекувањето, откако по третманите во болницата во грчка Лариса, 19-годишното момче почнало само да влегува во базен.
Пред две години, на плажа во Грција, Јани го повреди `рбетот и оттогаш е врзан за кревет. По речиси година и пол лежење во болница во грчка Лариса, каде што еден месец чини околу 10 илјади евра, младото момче во септември се враќа дома. Парите кои се собираа од донации секнуваат. Неговиот татко Васил не се помирува со ова и вели дека ќе направи се, неговиот син да го добие најдобриот третман.
Извор: 24vesti.mk
