Флотила со семејствата на израелските заложници се движи кон Газа во знак на протест поради негрижата на Владата

Флотила што носи семејства на израелски заложници тргна од пристаништето Ашкелон во јужен Израел кон Појасот Газа, во знак на протест против недејствувањето на нивната влада во процесот на преговори за прекин на огнот и размена на заложници со Хамас, јавува Анадолу.

Форумот на семејства на заложници преку соопштение истакна дека флотилата „Шајетет 50“ „штотуку исплови упатувајќи се кон југ за да се приближи што е можно поблиску до своите најблиски“.

Флотилата се состои од речиси 11 бротчиња и 20 лица, според израелскиот весник „Израел хајом“.

„Изјавите за освојување на Газа и проширување на борбите ги ставаат нашите најблиски во непосреден ризик од смрт и исчезнување. Враќањето на сите 50 заложници дома е единствената вистинска слика за победа“, рекоа семејствата во соопштението објавено од весникот „Једиот ахронот“.

Израелските медиуми, повикувајќи се на израелски претставници, соопштија дека премиерот Бенјамин Нетанјаху ја добил поддршката на САД за целосна реокупација на Газа и започнување воени операции во областите за кои се верува дека се држат заложниците. Кабинетот за безбедност треба да се состане денес и се очекува да одобри целосна воена окупација на енклавата.

Околу 50 Израелци се во Газа, а се верува дека приближно 20 се живи. Како одговор на тоа, Израел држи повеќе од 10.800 палестински притвореници, од кои многумина страдаат од тортура, глад и занемарување, според палестинските и израелските групи за човекови права.

Семејствата на заложниците и опозицијата го обвинуваат Нетанјаху за одложување на прекинот на огнот во Газа и делумната размена на затвореници за продолжување на војната и за да ја зачува неговата кревка коалиција.

Израел се соочува со растечки гнев во светот поради својата деструктивна војна во Газа, каде што од октомври 2023 година убиени се над 61.100 Палестинци. Воената кампања ја опустоши енклавата и ја доведе до работ на глад.

Минатиот ноември, Меѓународниот кривичен суд издаде налози за апсење на Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата за своите воени дејства во енклавата.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.