Со музичка изведба во живо на извадоци од „Шиндлерова листа“ на Џон Вилијамс, Филхармонијата денеска протестираше пред Министерството за култура, поради одлуката новоформираната национална институција Џез оркестар на Македонија привремено да биде сместена во објектот на Филхармонија. Музичарите дојдоа со озвучување, пултови, столици и партитури, и под диригенство на Дијана Имери ги изведоа музичките парчиња.
„Министерството за култура оваа одлука ја донесе без никаква консултација со нашата институција, заткулисно, тајно и без никаква поширока дебата, што за нас, е крајно поразително и деградирадирачки. Изминативе недели, нашиот глас, за жал не допре ниту до Министерството за култура, ниту, пак оттаму покажаа елементарно разбирање за суштинските проблеми кои ќе настанат доколку оваа одлука остане непроменета. Иако дел од стручната и пошироката јавност укажаа на последиците од носењето на оваа одлука, Министерството за култура до сега, не појави интерес за решавање на проблемот. Бидејќи неправедно сме ставени во ситуација да се браниме од оние кои треба да ја заштитат нашата културна институција – најстара во земјава, одлучивме нашето незадоволство да го изразиме преку мирни протести кои ќе се одржуваат до конечната промена на оваа одлука“, рече Владимир Лазаревски, претседател на Синдикатот на Филхармонијата.
На нашето прашање како се организирани и дали смеат да ја вадат опремата од матичната куќа, тој ни рече дека се синдикално организирани и покриени.
„Министерството за култура интензивно работи на решение кое набргу ќе го сподели со сите засегнати. Впрочем, тоа им го вети и министерката Бисера Костадиновска-Стојчевска на неколкуте средби. Веруваме дека на филхармоничарите набргу, кога ќе го слушнат решението, ќе им биде јасно дека со одлуката за привремено останување на џез-музичарите во Филхармонијата до правното регулирање на нивната НУ, никој немал никаква заднинска намера. Нема логика Министерството за култура, под чија надлежност се сите национални установи, значи и Филхармонијата и новоформираниот Џез-оркестар, да работи на штета на која било од нив“, соопшти Министерството после протестот на Филхармонијата.
Од Здружението на џез музичари и слободни уметници (ЗЏМ) на 10 април рекоа дека погрешно е претставен целиот концепт за нивното евентуално работење во зградата на Филхармонија, па оттаму произлегуваат и сите неосновани реакции.
Кавгата меѓу Филхармонија и Министерството за култура трае речиси еден месец, откако 108 вработени од музичката институција на 31 март потпишаа петиција против одлуката на Владата дека не сакаат да го делат објектот со колегите од Џез оркестарот. Истакнувајќи дека ја поздравуваат одлуката за формирање на Оркестар за џез музика, од Филхармонијата додаваат дека неговото сместување во иста зграда ќе се одрази на успешноста и на едните и на другите.
Б. НЕСТОРОСКА
ИЗВОР: sdk.mk
