АНКАРА (АА) – Турскиот министер за надворешни работи, Хакан Фидан, изјави дека Анкара е подготвена да го продолжи дијалогот со својот сосед Грција „без предуслови“, јавува Анадолу.
„Подготвени сме да го продолжиме дијалогот со нашиот сосед Грција без предуслови и да ги развиваме нашите односи врз основа на заеднички интереси во сите области“, рече Фидан на прес-конференција со неговиот грчки колега Јоргос Герапетритис во главниот град Анкара.
„Можеме да ги решиме нашите проблеми врз основа на меѓународното право, почитувајќи ги меѓусебните права и интереси“, додаде тој.
„Анкара и Атина имаат различни мислења за Егејското Море и Медитеранот“, рече Фидан и додаде: „Се договоривме да донесеме нови пристапи за решавање на проблемите.“
„Туркије влезе во ‘позитивна нова“ ера во односите со Грција“, нагласи шефот на турската дипломатија.
Герапетритис, од своја страна, рече дека наскоро ќе започнат мерките за градење доверба и разговорите меѓу Туркије и Грција.
„Се договоривме да продолжиме со позитивната агенда“, истакна Герапетритис, кој престојува во еднодневна работна посета на турската престолнина.
„Двете земји се очекува да одржат состанок на советот за соработка на високо ниво пред крајот на 2023 година, што е прв таков состанок во последните седум години“, рече грчкиот министер.
Туркије и Грција се два соседа кои од различни причини имаат „турбулентни односи“ со децении. И покрај тоа што 2021 година беше сведок на одредено подобрување во врските, различни прашања опстојуваат.
Туркије, која е членка на НАТО повеќе од 70 години, протестираше против повторените провокативни дејства и реторика на Грција во регионот во последниве години, вклучително и вооружување на островите во близина на турските брегови кои се демилитаризирани според долгогодишните договори, велејќи дека таквите потези ги оневозможуваат нејзините добронамерни напори за мир.
