Deklaratat e fundit të kryeministrit të Shqipërisë, Edi Rama, në Nju Jork për Kosovën dhe ish-presidentin Hashim Thaçi kanë rikthyer në vëmendje mënyrën se si ai e trajton çështjen e Kosovës në arenën ndërkombëtare.
Rama ka folur në vazhdimësi për situatën politike në Kosovë, për Hashim Thaçin dhe për zhvillimet që lidhen me Gjykatën Speciale, duke marrë qëndrime që kanë nxitur reagime dhe debate në opinionin shqiptar.
Në këtë kontekst, është ngritur edhe pyetja nëse Kosova dhe emri i Hashim Thaçit po përdoren nga Rama si pjesë e një strategjie politike dhe diplomatike, veçanërisht në raport me Shtetet e Bashkuara dhe zhvillimet në rajon.
Për këtë çështje, për “Bota sot” ka folur publicisti dhe veprimtari shqiptaro-amerikan Agim Aliçkaj, i cili shpreh kritika të forta ndaj qasjes së kryeministrit shqiptar dhe vlerëson se Kosova dhe Hashim Thaçi janë përdorur nga Rama në funksion të interesave të tij politike.
Kosova dhe Hashim Thaçi si instrumente politike
Aliçkaj thotë se deklaratat dhe veprimet e Ramës ndër vite, sipas tij, tregojnë një qasje të ndryshueshme ndaj çështjes së Kosovës dhe figurave politike shqiptare.
“Keqpërdorimi politik i çështjes së Kosovës dhe i emrit të Hashim Thaçit, e shpjegon më së miri karakterin e politikës së Edi Ramës. Kosova dhe Hashim Thaçi për të shpesh kanë shërbyer si figura shahu, të cilat i ka lëvizur sipas nevojave të momentit dhe interesave të veta politike”, deklaron Aliçkaj.
Ai përmend si pjesë të kritikave të tij edhe raportet e Ramës me presidentin serb Aleksandar Vuçiq, projektin “Ballkani i Hapur”, qëndrimet e tij ndaj zhvillimeve në veri të Kosovës dhe propozimin për Asociacionin e komunave me shumicë serbe.
Sipas Aliçkajt, këto qëndrime duhet të shihen në tërësinë e politikës së Ramës ndaj Kosovës dhe Serbisë.
“Rama ka ndërmarrë hapa që, sipas vlerësimit tim, kanë ndihmuar në rehabilitimin politik të Serbisë në rajon, edhe pse Serbia ende nuk është ballafaquar siç duhet me krimet e kryera në Kosovë”, shprehet ai.
Patriotizëm me fjalë, politikë tjetër në veprim
Duke komentuar deklaratat e fundit të Ramës në Nju Jork, Aliçkaj thotë se kritikat dhe deklaratat në mbrojtje të Hashim Thaçit nuk mund të shkëputen, sipas tij, nga zhvillimet politike në Shqipëri dhe marrëdhëniet e kryeministrit shqiptar me administratën amerikane.
“Deklarata e tij e fundit në Nju Jork, se ish-presidenti amerikan Joe Biden e ‘tradhtoi’ Hashim Thaçin, sipas mendimit tim, nuk ka bazë bindëse. Rama deklaroi publikisht se Shtetet e Bashkuara dhe Joe Biden nuk kishin bërë sa duhet për Thaçin dhe se procesi i Gjykatës Speciale nuk duhej të kishte filluar”, deklaron Aliçkaj.
Ai shton se e sheh këtë deklaratë edhe në kontekstin e përpjekjeve të Ramës për të ndërtuar marrëdhënie me Presidentin Donald Trump dhe administratën e tij.
“Lavdërimet e tepruara dhe shprehjet e dashurisë ndaj Hashim Thaçit mund të shërbejnë gjithashtu për të tërhequr simpatinë e mbështetësve të Thaçit në Kosovë dhe për të thelluar ndarjet partiake. Në të njëjtën kohë, dobësimi politik i Kosovës dhe i qeverisë së kryeministrit Kurti mund t’i shërbejë përpjekjes së Ramës për ta paraqitur veten si ‘lider stabil’ dhe si faktor i pazëvendësueshëm shqiptar në rajon”, thotë Aliçkaj.
Sipas tij, deklaratat për Kosovën dhe Thaçin duhet të analizohen jo vetëm në aspektin e përmbajtjes së tyre, por edhe në kontekstin politik në të cilin bëhen.
“Kosova nuk duhet të përdoret si instrument politik”
Aliçkaj shprehet kritik ndaj asaj që e konsideron përdorim të çështjes së Kosovës për interesa politike dhe thekson rëndësinë që, sipas tij, Shqipëria të ketë një qasje të qëndrueshme ndaj Kosovës dhe interesave shqiptare.
Ai rikujton se Rama ka mbajtur ndër vite qëndrime të ndryshme për çështje që lidhen me Kosovën, ndërsa sot, sipas tij, shfaqet si një nga zërat më të fortë në mbrojtje të Hashim Thaçit dhe ish-drejtuesve të UÇK-së.
“Sa i përket Gjykatës Speciale, mbetet e nevojshme të rikujtohet dhe të sqarohet plotësisht roli politik që kanë luajtur Edi Rama dhe udhëheqësit shqiptarë në procesin që çoi në krijimin e saj. Sot Rama paraqitet si një nga kritikët më të zëshëm të kësaj gjykate dhe si mbrojtës i Hashim Thaçit dhe ish-drejtuesve të UÇK-së. Është e diskutueshme nëse këto veprime i ndihmojnë të akuzuarit në Hagë”, deklaron Aliçkaj.
Në fund, ai vlerëson se politika shqiptare duhet të fokusohet në forcimin e raporteve me Shtetet e Bashkuara dhe Perëndimin, si dhe në një bashkëpunim më të natyrshëm mes Shqipërisë dhe Kosovës.
“Shqiptarëve u duhet një Shqipëri demokratike, e lirë nga korrupsioni, e orientuar fuqishëm drejt Shteteve të Bashkuara dhe Perëndimit dhe e lidhur natyrshëm me Kosovën dhe interesat kombëtare shqiptare”, përfundon Agim Aliçkaj për “Bota sot”.
Burimi: botasot
