Со голема вознемиреност и жал ги примивме информациите за големата трагедија што се случи вчера во дискотеката „Пулс“ во Кочани. Навистина, тоа се моменти кои совесните луѓе и оние кои искрено ги сакаат и почитуваат своите ближни никому не му посакуваат такво нешто. Додека оние, кои гледаат да дојдат само до дополнителна материјална корист воопшто не размислуваат за одговорноста и цената на животот, па дозволиле еден настан од такви големи размери да се одржи во такви бедни услови, велат од Суперинтендент на ЕМЦ во Македонија, Пастор Марјан Димов.
-Но колку и да бараме сега кривица кај другите, со тоа нема да ги вратиме животите на оние кои пострадаа, ниту, пак, ќе ја одземеме болката од оние кои беа повредени и од оние кои ги загубија своите мили. Во името на Евангелско-Методистичката Црква во Македонија сакам да изразам искрено сочувство до фамилиите на повредените и настраданите во тој немил настан. Посебно сочувство упатуваме до семејството на нашиот пострадан сограѓанин Ѓорги Ѓоргиев. Повторно ќе кажам, нема такви зборови со кои би се опишала загубата на животот и болката на останатите позади нив. Нека вистинскиот жив и вечен Бог, Кој се објави во Исус Христос, ги утеши вашите срца, велат од ЕМЦ.
ИЗВОР: kurir.mk
