Треба да го видиме вистинскиот напор на Косово за формирање на ЗСО, но треба да ги видиме и чекорите преземени од страна на Србија. Тоа треба да се направи сега – да се договориме за тоа денес и утре, бидејќи од петок Мирослав Лајчак и јас треба да го поднесеме извештајот до нашите претпоставени дали успеавме на нашата посредничка мисија или не, вели заменик-помошниот државен секретар на САД и специјален пратеник за Западен Балкан, Габриел Ескобар
Косовскиот премиер Албин Курти има два дена да одговори на барањата на меѓународната заедница, во чиј фокус е формирање на Заедницата на српски општини (ЗСО), пред да биде поднесен извештај за успешноста на посредничката мисија на Габриел Ескобар и Мирослав Лајчак за односите меѓу Белград и Приштина.
Ова во изјава за косовските медиуми го изјавил заменик-помошниот државен секретар на САД и специјален пратеник за Западен Балкан, Габриел Ескобар, кој заедно со специјалниот пратеник на ЕУ за Косово и Србија, Мирослав Лајчак, вчера и денеска е во посета на Белград и Приштина.
Зборувајќи за актуелната ситуација на северот на Косово, Ескобар рекол дека е потребно спроведување на предлогот на ЕУ за итна деескалација, како и организација на нови избори на северот на Косово со учество на Србите и имплементација на Охридскиот договор.
„Тоа значи дека треба да го видиме вистинскиот напор на Косово за формирање на ЗСО, но треба да ги видиме и чекорите преземени од страна на Србија. Тоа треба да се направи сега, треба да се договориме за тоа денес и утре, бидејќи од петок Мирослав Лајчак и јас треба да го поднесеме извештајот до нашите претпоставени дали успеавме на нашата посредничка мисија или не“,
рекол Ескобар.
Доколку мисијата за посредување не успее, додал Ескобар, тоа ќе значи дека Косово не е заинтересирано за координација, поточно, како што рекол, „не Косово, туку премиерот Албин Курти“. Тој, сепак, кажал дека САД и Косово имаат силни односи, но дека постојат некои предизвици во билатералните односи со премиерот на Косово.
„Гледаме дека одлуки се носат и покрај нашето партнерство, а тоа е сигнал за нас. Ако му свртите грб на овој договор, сте ѝ свртеле грб на Европа, со сите последици што доаѓаат со него, нестабилност во односите, недостаток на финансии и слобода на движење“,
рекол Ескобар во изјава за косовските медиуми, јави Н1.
Ескобар ги повтори барањата што заедно со Лајчак, му ги изнел на Курти на синоќешната средба, додавајќи дека истото ќе го сторат и на средбите во Белград, каде што заминуваат по посетата на Приштина.
Извор: 360stepeni.mk
