Мирот во Југоисточна Азија е прекинат. Тајланд започна воздушни напади долж спорната граница со Камбоџа, откако пропадна кревкото примирје кое во октомври го исдејствуваше американскиот претседател Доналд Трамп.
Илјадници цивили повторно се во бегство. Тајландската армија потврди дека користи борбени авиони за, како што велат, сузбивање на нападите од страна на Камбоџа.
„Камбоџанската страна отвори оган во многу дополнителни области во зори… Тајланд возврати според нашата стратегија за одговор, фокусирајќи се на воените цели кои ги започнаа нападите врз Тајланд… Исто така побаравме воздушна поддршка од военото воздухопловство“, порача генерал-мајор Винтаи Суваре.
Официјален Бангкок тврди дека еден нивни војник е убиен, а осуммина се ранети. Министерството за одбрана на Тајланд соопшти дека над 35.000 луѓе веќе ги напуштиле пограничните села.
Од другата страна на границата, Пном Пен ги отфрла обвинувањата дека први пукале. Тие пријавуваат цивилни жртви и ја повикуваат меѓународната заедница итно да реагира.
„Камбоџа ја повикува меѓународната заедница силно да го осуди прекршувањето на Заедничката декларација и повторените нелегални дејствија на Тајланд. Бараме Тајланд веднаш да ги прекине сите непријателства кои го загрозуваат мирот и стабилноста во регионот“, вели Мали Сочеата.
Тензиите тлеат со месеци. Иако претседателот Трамп во ноември изјави дека „спречил војна“ меѓу соседите, инцидентите со нагазните мини минатиот месец го разнишаа примирјето.
Двете кралства имаат историја на непријателство што датира со векови, а модерниот спор произлегува од несогласувањата околу мапата исцртана уште во времето на француското колонијално владеење во 1907 година. Додека дипломатијата е во ќорсокак, илјадници семејства ноќва спијат во привремени засолништа.
Извор: tv21
