АНКАРА (АА) – Претседателот на Туркије, Реџеп Таип Ердоган, кој според неофицијалните резултати објавени од страна на Врховната изборна комисија на Туркије (ЈСК), е реизбран за претседател на земјата, истакна дека денес никој не изгубил, дека победник е Туркије и турската демократија, јавува Анадолу.
Ердоган во турскиот главен град Анкара одржа традиционално обраќање по изборите.
„Денес никој не изгуби. Денес победија сите 85 милиони граѓани. Веќе е време да се обединиме околу нашите национални цели и соништа“, порача Ердоган.
Турскиот претседател рече дека како секоја волја на својот народ така и овој изборен резултат е повеќе од добредојден за нив.
„Не сме само ние победници. Победник е Туркије, победник е нашата демократија“, додаде Ердоган.
Тој нагласи дека откако завршија изборите, сега сета енергија и време целосно ќе ги посветат на услугите и делата.
Осврнувајќи се на разорните земјотреси кои ја погодија Туркије на 6 февруари, Ердоган рече дека закрепнувањето на раните од овие земјотреси и опоравувањето на опустошените градови ќе продолжи да биде на врвот на нивните приоритети.
Турскиот претседател говорејќи за Сиријците кои се засолнети во Туркије, рече: „Досега обезбедивме доброволно враќање на околу 600.000 лица во безбедната зона на територијата на Сирија“
Нагласи дека со проектот за сместување кој го водат со Катар, ќе овозможат враќање на уште еден милион Сиријци за неколку години.
Што се однесува до економијата, турскиот претседател Ердоган истакна дека планираат економија фокусирана на финансиски менаџмент, инвестиции, вработувања.
„На патот ќе продолжиме со доверба и стабилност“, додаде Ердоган.
„Западните медиуми изгубија“, рече претседателот Ердоган по победата на изборите, потсетувајќи на нивното објавување насловни страници со цел да го „уништат“.
Претседателот на Врховната изборна комисија на Туркије (ЈСК), Ахмет Јенер, соопшти дека Ердоган победи во вториот круг од претседателските избори во земјата против неговиот противкандидат Кемал Киличдароглу.
Според неофицијалните резултати, актуелниот турски претседател победи во трката со освоени 52,14 отсто од гласовите, додека Киличдароглу доби 47,86 отсто од гласовите, рече Јенер.
Тој додаде дека досега се отворени 99,43 отсто од гласачките кутии.
Извор: www.aa.com.tr
