Во Собранието, пред утврдување на дневниот ред на 55. седница, беше објавена едночасовна пауза, на барање на пратеникот од Левица Димитар Апасиев.
Како и во претходните денови пред почетокот на пленарните седници од Левица бараат едночасовна пауза бидејќи, како што рече Апасиев, генералниот секретар на Собранието се уште не одговорил на барањето на пратеничката Јована Мојсоска од Левица за добивање информација за висината на патните трошоци и станарината што им е платена на некои пратеници.
Собранието денеска треба да ја одржи 55. седница со расправа по ратификации и закони од повеќе области.
На дневен ред се предлог законите за ратификација на Листата за измена на Листата на специфични обврски и Дисциплини за домашна регулатива во услугите и на Договорот меѓу Владата на Република Северна Македонија и Владата на Република Србија за воспоставување заеднички контроли на граничните премини за меѓународен патен сообраќај Табановце (Република Северна Македонија) и Прешево (Република Србија).
Пред пратенииците се и дополнетите предлог закони за изменување и дополнување на Законот за дивечот и ловството, на Законот за вработувањето и осигурување во случај на невработеност, на Законот за средното образование, во второ читање, како и предлог законите за изменување на Законот за приватните агенции за вработување, на Законот за волонтерството, на Законот за младински додаток, исто така во второ читање.
Дел од предложениот дневен ред се и Предлог законот за инспекциски надзор, по скратена постапка, како и Извештајот за работата на Комисијата за хартии од вредност за 2024 година.
За денеска во Собранието се закажани и продолженија на 48., 52., како и 47. пленарна седница.
Извор: 24vesti.mk
