Петар Богојески, директорот со најкраток стаж во Националната агенција за европски образовни програми и мобилност, си заминува од функцијата откако премиерот Христијан Мицкоски договори со него „прераспределба на позиции“: Лидерот на Македонски концепт треба да застане на чело на друга државна институција, а двете партии ќе настапат заедно на претстојните локални избори.
Рацин.мк разговараше со извор од кабинетот на Директорката на Директоријатот за образование, млади, спорт и култура – Пиа Хансен, која за Рацин.мк потврди дека од самиот почеток Директоријатот и клучните одговорни за спроведување на програмата Еразмус+ се изјасниле негативно на назначувањето на Богојески како директор на Националната агенција за европски образовни програми и мобилност. Тие тоа направиле со директно укажување преку непосредни дипломатски канали, но и преку Делегација на Европската Унија во Северна Македонија кон премиерот Мицкоски.
„Неговото назначување беше потсмевање за сѐ што ЕУ претставува и се обидува да изгради, вакви назначувања за задоволување на домашни политички апетити се дамка врз досието на тоа што се Македонија постигна изминативе декади и заложбата да биде полноправна членка. Едноставно мора да научите да се однесувате поодговорно“, се вели во изјавата која ја обезбедивме во телефонски разговор.
Повеќе граѓански организации уште во април побараа Владата да го повлече назначувањето на Богојески за директор на Националната агенција за европски образовни програми и мобилност поради долгата низа срамни испади на социјалните мрежи: вулгарни навреди, етнички и верски омразувачки пораки, па дури и отворени повици за насилство.
Тогашните апели на невладиниот сектор не допреа до владините уши, но молкот од Брисел очигледно беше погласен.
Сега, кога Богојески добива нова институционална адреса, прашањето е дали промената е награда, компромис или димна завеса за да се сочува коалицискиот мир пред локалните избори. Во секој случај, останува впечатокот дека во земја што чука на европската врата, говорот на омраза не се казнува, туку ротира по институциите.
Сепак, на заминувањето на Богојески од Националната агенција за европски образовни програми и мобилност, може да се гледа и како на победа на граѓанските организации и демократските медиуми и јавност, кои го кренаа својиот глас и постојано го алармираа Брисел за неговото назначување како проблематично.
ИЗВОР: racin.mk
