Радост, неверување и две години чекање собрани во еден момент. Ова се сцените од домот на семејството Бохбот, откако добија вест дека нивниот Елкана, по 738 дена поминати во заробеништво во Газа, конечно се враќа дома.
Ахува Хамо за првпат по две години го слушнала гласот на својот син, кој ѝ се јавил непосредно пред да биде предаден на Црвениот крст.
„Многу сум возбудена. Го видовме Елкана на видео, на Facetime, сестра ми разговараше со него и беше многу емотивно. Таа вели дека тој стои на нозе, се смее и ѝ рекол – мамо, добро сум, добро сум.“, вели Хамо.
Елкана се очекува да биде дел од втората група заложници што ќе бидат ослободени во текот на денот. Според договорот за прекин на огнот, Хамас денеска ослободи седум заложници, а се очекува вкупната бројка да достигне 20. За возврат, Израел ќе ослободи над 1.900 палестински затвореници.
Над 65.000 Израелци славеа на Плоштадот на заложниците.
Договорот вклучува и предавање на телата на 28 починати заложници, иако времето за тоа сè уште не е прецизирано.
Американскиот претседател Доналд Трамп, чие посредништво доведе до прекин на огнот во Појасот Газа и чиј авион слета во Израел, пристигна во израелскиот парламент. Беше пречекан со стоечки овации.
„Господине претседателе, денес ве поздравуваме овде за да ви се заблагодариме за вашето клучно водство во поднесувањето предлог кој доби поддршка од речиси целиот свет, предлог, предлог кој ги враќа сите наши заложници дома.“, изјави Нетанјаху.
„И по толку многу години непрекината војна и бескрајна опасност, денес небото е мирно, оружјата се тивки, сирените се мирни и сонцето изгрева на света земја која конечно е во мир – земја и регион кој ќе живее, со Божја волја, во мир за цела вечност.“, рече Трамп.
Израел ја започна својата воена операција во Појасот Газа откако милитантите на Хамас извршија невиден напад врз еврејската држава на 7 октомври 2023 година.
„Доналд Трамп е најголемиот пријател што државата Израел некогаш го имала во Белата куќа.“, изјави Нетанјаху.
Извор: tv21
