Градот Скопје е преплавен со илјадници диви таксисти, додека надлежните институции не преземаат конкретни мерки за решавање на овој хроничен проблем. Граѓаните, оставени без заштита, често се соочуваат со неправедни цени за превоз, а разликата меѓу лиценцираните и дивите таксисти станува сѐ понезабележлива, особено бидејќи жолтите таблички веќе не се сигурен показател за легалноста на возилата.
„Ми беше потребно такси од Железничка до Ѓорче Петров. Не можев да најдам преку повик, па прифатив понуда од таксист со жолти таблички. Кога му кажав каде треба да одам, побара 700 денари . Иако инсистирав на користење таксиметар, тој одговори дека не му работи. Обично сумата не надминува 500 денари. Немав избор и морав да платам“, споделува жителка на Скопје.
Претседателот на Групацијата на авто-такси превозници на Град Скопје, Сашо Рајчановски, истакнува дека проблемот со дивите таксисти ескалирал во последните години. Според него, недостигот на редовни контроли и пасивноста на инспекциите се главните причини за хаосот.
„Законот и одлуките постојат, но никој не ги спроведува. Голем број од лиценцираните таксисти ги напуштаат компаниите бидејќи дивите таксисти заработуваат повеќе без никаква контрола или обврски“, додава Рајчановски.
Тој објаснува дека дивите таксисти, кои често користат нерегулирани апликации и не издаваат фискални сметки, наплаќаат неколкупати повисоки суми од реалните. Дополнително, дел од нив користат возила кои не ги исполнуваат безбедносните стандарди, што претставува ризик за патниците.
Рајчановски предлага интензивни инспекциски контроли и строго спроведување на законите како начин за решавање на проблемот. Тој посочува дека, со отстранување на дивите таксисти, не само што ќе се подобри квалитетот на услугата, туку ќе се отвори и простор за нови легални вработувања, што ќе донесе финансиски придонеси за државата.
„Ако има волја, проблемот може да се реши за еден месец. Инспекторите мора да се активираат, а ако е потребно, да се побара и помош од републичките инспектори. Без тоа, хаосот ќе продолжи“, заклучува Рајчановски.
ИЗВОР: racin.mk
