Поранешниот премиер Зоран Заев во присуство на Нола Исмајлоска од мене барал д аја повлечам кривичната пријава за проневера на 2,2 милиони европски пари што јас ја открив, изјави денеска поранешната директорка на Националната агенција за образовни програми и мобилност, Лидија Димова. Во изјава за „Фокус“ таа рече дека пријавата ја поднела во 2019 година до тогашниот државен јавен обвинител Љубомир Јовески, а следната година дошло до барањето да ја повлече кривичната пријава. Димова тврди дека проневерата што таа ја открила нема врска со судскиот случај во кој таа е обвинета за злоупотреба на околу 320.000 евра европски пари додека раководела со Агенцијата. Таа додава дека барањето на ЕК да се вратат 2,2 милиони евра дошло по истрагата за овој случај водена од Европската канцеларија за борба против измами (ОЛАФ). Димова вели дека кога ја открила измамата ја запрела и исплатата на парите.
-Она што ОЛАФ го бара е 2,2 милиони евра од проневерата што ја открив јас, а не наводни средства за кои ме товари обвинителството мене. Во април 2020 година, од Владата ми беше доставен „поздрав“ со листа на проекти што требаше да ги “пуштам“. Во јуни 2020 година, тогашниот премиер Зоран Заев – во присуство на Нола Исмајлоска – од мене побара да ја повлечам кривичната пријава. Во октомври бев разрешена поради „неетичко однесување“ (прашајте го Љупчо Николовски што значи тоа), а во јули 2021 година Нола беше именувана за регионален координатор за ЕУ, се разбира, откако гласаше за промена на името на државата. Во следните неколку месеци новиот директор на Националната агенција, Марко Ѓоргиевски, ги доисплати сите спорни проекти од шемата вредна 2,2 милиони евра, вели Димова за „Фокус“.
Вчера актуелниот директор на Националната агенција за европски образовни програми и мобилност, Марко Ѓоргиевски, соопшти дека Агенцијата во текот на месецов добила известување дека треба да изврши поврат на 2,2 милиони евра злоупотребени преку програмата „Еразмус плус“ од 2016 до 2018 година. Ѓоргиевски изјави дека во известувањето биле информирани дека постојат одредени наоди за неправилности во врска со проектни досиеја на 22 корисници на грант од програмата „Еразмус плус“ финансирани од Европската комисија.
Димова тврди дека Јавното обвинителство во предметот против неа не видело поврзаност меѓу нејзиниот случај и случајот со 2,2 милиони евра и дека ОЛАФ тврди дека таа не направила злоупотреби.
Во врска со нејзините тврдења, од неделникот го контактирале поранешниот премиер и екслидер на СДСМ, Зоран Заев, но тој не одговорил на нивното прашање. Од друга страна, националната координаторка за регионална соработка и европски интеграции, Нола Исмајлоска-Старова, на прашањата од неделникот дали се точни тврдењата на Димова изјавила дека станува збор за целосна невистина.
Извор: skopskoeho.mk
