Овие денови, поточно на 9 февруари, се навршија 10 години од емитувањето на емисијата „Топ тема“, на ТВ Телма.
Како што посочува уредникот на дебатните емисии на ТВ Телма и водител на оваа емисија Боби Христов на социјалните мрежи, емитувањето на „Топ Тема“ „започна вовреме, во крајно авторитарен систем, со системска контрола врз медиумите“ и многу бргу стана „редок прозорец на слободната мисла, промотор и заговорник на различните ставови и мислења“.
„Во тие околности со огромна поддршка на менаџментот и сопствениците да се истрае во мисијата во служба на јавноста, без оглед на бескрупулозните притисоци и игнорирања од тогашната владејачка структура беше предизвикувачко време од многу аспекти“, оценува Христов.
Во изданието на емисијата од 12 февруари гостуваше Александар Чомовски, кој го водеше првото издание на „Топ тема“ кој потсети на отворената програма под истиот бренд „Топ тема“ од 27 април 2027 година, кога репортерите на ТВ Телма, со координацијата на Чомовски во студиото на најпрофесионален начин известуваа од овој трауматичен настан од поновата историја на Македонија.
Уредникот на „Топ тема“ Христов во објавата на социјалните мрежи објаснува дека поканата за ко-водителство до Александар Чомовски беше симболично одбележување на тој траен белег што во тоа време го оставија оваа емисија и ТВ Телма, кој никој не може да го негира.
„Дури ни оние кои се изнедрија како чинители во креирањето на јавното мислење, како дел од гласното НЕ на тогаш авторитарните тенденции и пракси, а денеска ‘плукаат во бунарот од кој пиеле вода’ (а верувајте ги има многу)“, коментира Христов.
Во поширок контекст на улогата на медиумите и новинарскиот придонес што ги даде и дава „Топ тема“ на ТВ Телма, не може да не се согласиме и со неговото укажување дека „мораме да градиме општество на вредности, на взаемно почитување, оти ниту едно ‘денеска’ не е без корен во ‘вчера’ , а без нив пак иднината е безсуштинска“.
Рацин.мк им се продружува не честитиките за јубилејот на емисијата „Топе тема“ и на колегите од ТВ Телма, и им посакуваме ушто долго присуство во етерот.
ИЗВОР: racin.mk
