Потпретседателката на СДСМ, Ана Чупеска во Аргумент плус рече дека дел од имињата кои се најдоа на советничката листа на премиерот Мицкоски се доволен показател дека ВМРО-ДПМНЕ има влијание од поранешниот премиер и лидер Никола Груевски. Според неа, иако овие имиња треба да ги гледаме во судовите, сепак државата најдува начин да ги оправда нивните постапки. Таа појасни и дека измените на Кривичниот законик од позиција на опозиција се грешка.
„Освен тоа што ова е тешка катастрофа значи и дека партијата ќе има поголемо влијание од Груевски. Ние имавме многу прилики да чуеме што работеа и правеа овие луѓе сепак се продолжува да се работи по старите режимски навики“, рече Чупеска и додаде дека лица кои се вмешани во нападот на 27 април не може да советуваат ништо освен како да се направи повторен државен удар.
„СДСМ не е на власт и нашиот став е јасен, сакаме измена и нов Кривичен законик, тоа е неспорно. Од позиција на опозиција свесни сме дека измената беше голема грешка и тука нема никаква дилема. Сите што сме во моментов на раководни фукции на партијата сите сме со таков став“, изјави таа.
Чупеска зборуваше и за посетата на премиерот Христијан Мицкоски во САД и рече дека СДСМ на тоа гледа како ПР екскурзија. Според неа, најавите за нови инвестиции доаѓаат во време кога Трамп воведува нови царини и такси а средбите на премиерот, како што вели таа, немаат ефект.
Извор: 24vesti.mk
