Честитка од претседателката Сиљановска Давкова по повод муслиманскиот празник Курбан Бајрам

Претседателката на државата Гордана Сиљановска Давкова, по повод големиот муслимански празник Курбан Бајрам, упати честитка до поглаварот на Исламската верска заедница, реис-ул-улема Шаќир Фетаху и до сите граѓани од исламска вероисповед.

„Да си даруваме и помагаме, да си бидеме поткрепа еден на друг, заедно во добро и лошо без разлика на верската, етничката, половата или било која припадност и да работиме на просперитетот на нашата татковина и благосостојбата на сите македонски граѓани“, се наведува во честитката од претседателката Сиљановска Давкова.