МЕРСИН (АА) – Во соработка предводена од турската Црвена полумесечина уште еден брод со 2.737 тони хуманитарна помош замина од јужната турска област Мерсин кон Појасот Газа, кој е разурнат од војна, пренесува Анадолу.
Помошта вклучува пакети со храна, вода, брашно, облека, хигиенски производи, шатори, вреќи за спиење, ќебиња, материјали за засолниште и медицински материјали.
На церемонијата пред тргнувањето на помошта за Газа, претседателката на турската Црвена полумесечина, Фатма Мерич Јилмаз, рече дека помошта ќе стигне до египетското пристаниште Ал-Ариш, од каде што ќе биде натоварена во камиони за предвидената дестинација.
Туркије работи на поддршка на Палестина, а досега има испратено помош со 12 авиони и шест брода.
Израел започна воена офанзива врз Појасот Газа по офанзивата на Хамас на 7 октомври, во која се убиени повеќе од 30.800 Палестинци. Војната, исто така, доведе до масовно раселување, уништување и недостиг на храна во опколената енклава.
Израел е обвинет за геноцид пред Меѓународниот суд на правдата, кој со привремената одлука во јануари му нареди на Тел Авив да ги запре геноцидните дејства и да преземе мерки за да гарантира хуманитарна помош за цивилите во Газа.
Извор: Anadolu Agency (AA)
