Двајца членови на Ју-Ту, Боно Вокс и Д Еџ беа изненадување на вечерта, на синоќешното свечено отворање на 29. Сараевски филмски фестивал. Двајцата легендарни музичари дојдоа заедно со нивните сопруги, како и моделката и активистка Кристи Тарлингтон и новинарката на Си-Ен-Ен, Кристијана Аманпур. Фестивалот отвори со документарецот „Бакни ја иднината“ на Ненад Чичин-Шаин, кој е инспириран од Ју-Ту и нивната значајна улога за воено и повоено Сараево и неговите жители.
Во филмот е прикажан активизмот на Боно и настапот на Ју-Ту на стадионот Вембли во Лондон, пред точно 30 години. Врската на Боно со Сараево и Сараевскиот филмски фестивал трае веќе неколку децении. По посетата на Фестивалот во 2000 и 2021 година, тој често доаѓа во Сараево како поддршка на фестивалот.
Оваа година, Сараевскиот филмски фестивал ја одбележува 30-годишнината од првото воено кино Аполо, кога градот беше под опсада, а публиката се собра да гледа филмови во подрумот на Академијата за драмски уметности, со што се прославува јубилејот поврзан со самиот почеток на фестивалот. Приказната е токму за заедницата која продолжи да работи и живее во текот на опсадата на Сараево во 1990-тите. Во филмот исто така се појавува и Аманпур, која раскажува за своето искуство како млада репортерка која известувала за војната.
Боно и Кристијана Аманпур синоќа во Сараево. (Фото: Дедлајн)
Фестивалот ќе трае до 18 август, а во трка за Срце на Сараево се 49 филмови.
Две македонски копродукции ќе имаат светска премиера во конкуренцијата за награди за документарци, „Тело“ на Петра Селишкар копродукција со Словенија и „Молк на разумот“ на Кумјана Новакова со БиХ. Екипа на „Кајмак“ со режисерот Милчо Манчевски на 17 август ќе продефилира на црвениот килим, во програмата Open Air.
ИЗВОР: sdk.mk
