Богоев: ВМРО-ДПМНЕ да го прифати Манифестот – „Европеизација е Македонизација, а ВМРО-ДПМНЕ сака изолација“

Манифестот има за цел уште еднаш да даде гаранции дека преговорите ќе ги водиме сите заедно, транспарентно, ефикасно и ефективно затоа што заедничка цел ни е Македонија да стане членка на Европската унија до 2030 година. Ова го изјави потпретседателот на СДСМ Стефан Богоев во летното издание на Клик плус на ТВ21 кој ја повика опозицијата да каже што е проблематично во предложениот Манифест за преговори со Европската унија откако од ВМРО-ДПМНЕ рекоа дека со овој чекор уште еднаш се испушта можноста за консензус.

„Еве нека кажат што е проблематично во Манифестот. Тоа што Манифестот гарантира заштита на нашиот македонски јазик и македонска култура и македонска национална определба? Тоа ли е спорно? Што има спорно во Манифестот? Спорно ли е до 2030 да се потрудиме да станеме членка на Европска унија? Нека кажат што е спорно еве се бунат сакале да бидат дел од изработка од не знам што, еве нека кажат што е спорно?“, вели Стефан Богоев.

Од ВМРО-ДПМНЕ и денеска со критики дека за овој документ не биле консултирани туку само се бара да го прифатат, но сепак велат дека откако ќе го добијат Манифестот ќе го разгледаат и потоа ќе се произнесат.

„Освен тоа што со овој чекор тие признаваат дека не мрднале ниту милиметар во насока на остварување на стратешките интереси на државата тие покажуваат и отсуство на целосен капацитет за градење на консензус. ВМРО-ДПМНЕ откако официјално ќе го добие овој документ ако воопшто има основа за разгледување ќе го изанализира и ќе излезе со свој став“, додаде Наум Стоилковски.

Богоев, сепак повторува и на договорот постигнат на лидерската средба меѓу Ковачевски и Мицкоски во кој иако беше договорена техничка Влада без ДУИ и тие места да ги заземе ВМРО-ДПМНЕ по што Ковачевски потоа рече дека ќе им ги отстапи и дел од местата на СДСМ сепак потоа од таквиот договор Мицкоски се повлече. Неофицијално и дел од министри на СДСМ деновиве ќе поднесат условени оставки кои би биле валидни доколку ВМРО-ДПМНЕ ги поддржи уставните измени.

„Ние рековме дојди гласај за уставните измени за добро на државата за добро на граѓаните зашто Европска унија значи пари прогрес и напредок за возврат на тоа ќе распишеме избори и ќе има Влада претходно широка во која што ДУИ ќе напушти и пола од нашите министерства ќе ги дадеме на ВМРО-ДПМНЕ. Сега ни е на дофат Европска унија. Сега овој чекор ако не го направиме тогаш следува бугаризација. Зашто што е бугаризација што ВМРО-ДПМНЕ ја збори во континуитет. Бугаризација беше 11 години додека ВМРО-ДПМНЕ беше на власт, зашто во тие 11 години се извадени рекорден број на бугарски пасоши“, вели Стефан Богоев.

Од СДСМ заедно со коалиција вчера понудија Манифест за преговори со Европската унија во кој се наведува дека политичките партии ќе се обединат околу евроинтегративниот процес.