ВИЕНА (АА) – Австриската крајно десничарска Слободарска партија (ФПО) и централно десничарската Народна партија (ОВП) се согласија денес да воведат забрана за носење марами за девојчиња под 14 години во училиштата, како дел од коалициските преговори, според нацрт-владината програма што протече во јавноста, јавува Анадолу.
Австрија сè уште нема формирано нова влада и покрај одржаните општи избори на 29 септември.
Преговорите меѓу ФПО и ОВП траат повеќе од еден месец и блокирани се поради несогласувања за клучни прашања, но сепак бил постигнат договор за контроверзни политики поврзани со миграцијата и интеграцијата.
Документот од 233 страници што протече во јавноста, кој австриските медиуми го нарекоа „доверлив протокол“, открива консензус за забрана на марами во училиштата и зголемена контрола на државата врз исламското верско образование.
Документот ја дефинира марамата како „алатка за принуда“ и предлага проширување на забраната во јавните институции.
Нацрт-програмата вклучува и поригорозни имиграциски политики, намалување на социјалните бенефиции и прекинување на процесот за пристапување на Туркије во ЕУ.
Исто така, се повикува на затворање на политички движења што се сметаат за „опасни“, вклучително и „Liste Gaza“ (Листата од Газа) – група која тврди дека во Газа се случил геноцид.
Сепак, остануваат големи несогласувања во надворешната политика и распределбата на министерствата.
ФПО, позната по својот проруски став, е во судир со ОВП во однос на ставот на Австрија кон ЕУ.
Крајно десничарската партија бара контрола врз Министерството за внатрешни работи и Министерството за финансии, што претставува клучна точка на раздор во преговорите.
Лидерите на ФПО и ОВП треба повторно да се сретнат пред да се консултираат со претседателот Александер ван дер Белен.
Резултатот од овие состаноци ќе одреди дали коалициските преговори ќе продолжат или ќе пропаднат, продлабочувајќи ја политичката неизвесност во Австрија.
Извор: Anadolu Agency (AA)
