Гордана Силјановска-Давкова има предност од 10,2 отсто во однос на Стево Пендаровски, покажува мартовската анкета на ИПИС. Разликата во рејтингот меѓу кандидатката на ВМРО-ДПМНЕ за претседател на државата Силјановска Давкова и кандидатот на СДСМ Пендаровски се зголемила за 1,45 отсто за еден месец и од 8,75 проценти во февруари, сега изнесува 10,2 отсто, покажува анкетата спроведена од ИПИС во март на ниво на државата, објавена во синоќешната емисија Објектив на МРТ.
На прашањето „за кого ќе гласате на претстојните претседателски избори?“ 24,6 отсто од анкетираните одговориле дека ќе гласаат за професорката Гордана Силјаноска Давкова, а 14,4 проценти се изјасниле за актуелниот претседател Стево Пендаровски. По нив следат Бујар Османи со 7,0 отсто поддршка, Таравари со 5,7 проценти, Билјана Ванковска со 3,5 отсто итн.
Споредено со февруари има зголемување на потенцијалните гласачи и кај Силјановска и кај Пендаровски, но сепак растот е поголем кај кандидатката поддржана од ВМРО-ДПМНЕ.
Во февруари за Силјановска се изјасниле 20,2 проценти, што значи дека за еден месец нејзината поддршка пораснала за 4,4 отсто, а Пендаровски во февруари имал 11,5 отсто поддршка, и таа во март се зголемила за 2,9 проценти.
Извор: skopskoeho.mk
