Албанската опозиција ја отфрли идејата на Ахмети – Муртезани: Ќе настапиме со посебна листа

Првиот човек на ДУИ, Али Ахмети, пред неколку дена за ТВ21 ја откри својата идеја на следните избори сите албански партии да настапат заедно на една листа.

А.А.: Подготвен сум на една листа. Односно сите албански партии на една листа, и денес тоа е техника..

Н: Сите политички субјекти со вас?

А.А.: Со нас, со нас, но секој со своја автономија.

Но, албанската опозиција не се согласува. Орхан Муртезани од Алтернатива вели дека веќе ја формирале здружената албанска опозиција и на следните избори ќе настапат со посебна листа.

„Го создадовме албанскиот опозициски фронт и секако дека ќе одиме со посебни листи“, вели Орхан Муртезани.

Соработката на изборите меѓу сите албански политички партии ја поздрави и поранешниот шеф на АА, Зијадин Села. Сепак, Села додаде дека не би сакал да соработува со албанската опозиција, поради, како што рече, горчливите искуства во минатото.

„Ако продолжиме со ваква авантура, можеме само да испратиме порака дека сакаме да нè изневеруваат, ништо друго. Зарем овој народ не ја научи лекцијата, ќе бидат во право. Велам дека досегашното искуство покажа дека сме подале рака и сме згрешиле“, вели Зиадин Села.

За изјавите на Села, Муртезани вели дека АА во моментов е во незавидна позиција и додава дека сега е време АА да одлучи дали, како што вели, ќе остане опашка на ДУИ, или ќе премине во опозиција.

„Искрено ни е жал за ситуацијата во која се најде Алијанса за Албанците и за крајно неповолната позиција, се додека тие се во оваа неповолна положба, не може да се очекува да донесат каква било рационална одлука. Според она што го гледаме, изгледа дека имаат само две опции. Првата работа на следните избори е да стане опашка на ДУИ како што направија во Владата и да останат со двајца-тројца пратеници на тие заеднички листи. А втората опција е некои од оние кои не се согласуваат со оваа одлука да се отцепат и да ни се придружат“, порача Орхан Муртезани.

Во однос на соработката со АА, Движењето Беса и Демократското движење вчера изразија отвореност. Од Беса порачаа дека Таравари е добредојден да се приклучи на опозицискиот фронт, но прво мора да го разјаснат својот став дали се оградуваат од политиките на оваа власт.