Ахмети по повод жртвите од масакрот во Сопот – Мицкоски: Кога гледате национализам, да знаете дека се бира некој тендер

Под мотото „Тие се живи“, викендов во меморијалниот комплекс во Сопот, Куманово, се одбележа денот на жртвите од масакрот во Сопот на 4 ноември 1944. На овој настан присуствуваше претседателот на ДУИ, Али Ахмети заедно со неколку сопартијци. Тој во својот говор рече дека крвта не станува вода и дека не го забораваат минатото ниту дека го забораваат аманетот на предците.

„Со подигањето на овој споменик се потсетуваме на паднатите борци, сите тие кои мислеа дека со фрлањето земја се ќе се заборави. Но крвта не е вода и се може да се избрише и измие, но крвта не се мие и не се заборава. Горе се мачениците, подолу се гради музеј и секој камен што го гледаме овде говори за една историја. Затоа, овие камења говорат од овој рид дека ние не го забораваме минатото, не го забораваме аманетот од предците, затоа работиме и се бориме за нивниот спомен“, вели Али Ахмети.

Овој настан го коментираше лидерот на ВМРО-ДПМНЕ, Христијан Мицкоски. Тој рече дека секојпат кога ДУИ е фатена во кражба, веднаш се вртат кон националистички теми.

Во последно време ВМРО-ДПМНЕ упати последователни обвинувања до ДУИ, додека од партијата на Ахмети неколку пати предупредија дека е формирана група од македонски олигарси кои работат на уривање на ДУИ. Во интервју за Радио Слободна Европа вчера потпретседателот на ВМРО-ДПМНЕ рече дека на наредните избори не е можна коалиција со ДУИ.