Актерот Перо Арсовски во Аргумент плус рече дека во Македонија сака да види култура во која културните работници нема да се само државни службеници туку борци со уметничка мотивација и порив за работа. Според него, иако театрите се полни секој ден, во последно време на гледачите им нудат само евтина забава од кратки смешни претстави и стенд ап настапи.
„Моето поимање за културен работник е многу пошироко од тоа да биде само на сцена или да биде обезбеден од државата и да нема никаков мотив да работи и да биде битен во својата област, и со тоа да чувствува обврска да се оддолжи кон неа и кон власта. Тоа ја отапува острицата на критиката. Кај нас особено во културата не постои критика иако таа е потребна за да ја лоцира дијагнозата и ни покаже каде се проблемите и автоматски да се мотивираме и да бидеме поактивни и да бараме решение“, рече Арсовски и додаде дека има многу уметници кои не живеат во Македонија но се уште земаат плата од матичните институции.
Тој објасни и дека овој проблем е присутен и во останатите сектори и доколку почне јасно да се зборува за тоа кој не оди на работа а зема плата ќе се отвори Пандорина кутија која ќе повлече многу нови нешта. Според него, проблемот е во тоа што културата е секогаш на последно место за секоја нова власт и никој никогаш не сака да ги разгледа и реши проблемите.
„Најлошо за културата е што таа е тринаесетто прасе на политичарите и секогаш културата ја оставаат на опашката во нивното пазарење коалициите и тоа Министерство се доделува само на една или друга партија. Фактот дека во последниве шест години сменивме пет министри покажува колку овој сектор им е небитен“, изјави Арсовски и појасни дека буџетот кој се одвојува за култура е дополнителен проблем бидејќи не е соодветно распореден.
Арсовски потенцираше и дека многу пати се обидел да зборува за проблемите кои ги има културата во нашата држава, но никогаш не добил разбирање и поддршка ниту од министрите ниту од колегите.
Извор: 24vesti.mk
