Карла Софија Гаскон денеска стана првата трансродова личност која била номинирана за Оскар во која било актерска категорија. Педесет и двегодишната Шпанка е номинирана за најдобра актерка за филмот „Емилија Перез“, кој освои најмногу номинации – 13.
Филмот во продукција на „Нетфликс“ ја следи Емилија, озлогласена шефица на наркокартел која бара помош од адвокатка (Зои Салдана) за да ја лажира својата смрт и да направи операција за промена на пол. Таа потоа сака да почне нов живот како социјална работничка.
Родена во Мадрид, Гаскон се преселила од Шпанија во Мексико во 2009 и таму почнала да глуми во теленовели. Со поддршка од сопругата и нивниот, тогаш малолетен син, Гаскон ја почнала транзицијата во 2018, а четири години подоцна ја добила улогата што ѝ донесе светска слава.
„Пред некој ден, една жена ми пријде и ми кажа колку прекрасно одглумив. Потоа ме праша: ‘Ако ве номинираат за Оскар, дали тоа ќе биде за најдобар актер или за најдобра актерка?‘ А, јас ѝ реков: ‘Госпоѓо, јас сум жена‘“, кажа Гаскон.
За истата улога, таа доби Златна палма за најдобра актерка на ланскиот Кански фестивал и беше номинирана за Златен глобус.
ИЗВОР: sdk.mk
