Хрватскиот филм „Човекот кој не можеше да молчи“ на режисерот и сценарист Небојша Слијепчевиќ доби номинација за Оскар во категоријата најдобар краток игран филм, соопшти денеска Академијата за филмска уметност и наука. „Човекот кој не можеше да молчи“ лани доби Златна палма за краток филм на Канскиот фестивал и стана првиот хрватски филм со оваа престижна награда. Филмот доби и Европската награда за најдобар краток филм од Европската филмска академија (ЕФА) .
Филмот е снимен во копродукција со Бугарија, Франција и Словенија, а во актерската екипа се Горан Богдан, Алексис Маненти и Драган Миќановиќ. Заснован врз вистински настан, дејството се случува во 1993 на малата железничка станица во Штрпци, БиХ, кога паравоени сили запираат патнички воз на релацијата Белград-Бар. Додека одведуваат невини цивили, само еден од 500 патници им се спротивставува. Членови на српска паравоена организација влегле во возот на станицата Штрпци во близина на Вишеград, побарале лични карти од патниците и одвеле 18 Босанци и еден Хрват, кои потоа ги мачеле, ги убиле, а телата им ги фрлиле во реката Дрина.
„Пресреќен сум што ја добивме оваа номинација, иако сè уште ми изгледа малку надреално. Веројатно целосно ќе го сфатам она што го постигнавме откако ќе почнеме да ги пакуваме куферите за Лос Анџелес. За време на оваа долга кампања за Оскар, многу ми значеше големата поддршка од целата филмска заедница“, изјави режисерот Слијепчевиќ.
Оскарите по 97. пат ќе се доделат на 3 март во Лос Анџелес.
ИЗВОР: sdk.mk
