ИСТАНБУЛ (АА) – Турскиот национален авиопревозник „Туркиш ерлајнс“ денес продолжи со летовите за Сирија со првиот лет Истанбул-Дамаск по 13 години откако ги прекина операциите во 2012 година поради граѓанската војна во земјата што траеше повеќе од десетина години, јавува Анадолу.
Многу Сиријци изразија радост поради враќањето во татковината по години егзил. Некои носеа знамиња од декемвриската сириска револуција, кога брзо падна режимот на Асад.
Речиси 350 патници се качија на авионот што полета за Меѓународниот аеродром во Дамаск откако им беше извршена проверка на билетите и пасошите.
Патничката Фатма Зехра за новинарите изјави дека дошла во Туркије кога имала само 2 години и дека е многу возбудена што заедно со семејството се враќа во татковината каде што е родена.
Сега 14-годишната Зехра рече: „Никогаш не сум ја видела мојата земја. Многу сум возбудена што ќе ја видам првпат. Од Дамаск ќе одиме во Алепо. Таму ќе ја видам баба ми.“
Околу 4 милиони Сиријци се засолнија во соседна Туркије за време на војната, која прими повеќе Сиријци од која било земја во светот.
Ахмет Кираз, друг патник, рече дека дошол во Туркије во 2012 година, каде што изградил живот со учење и работа и дека никогаш не очекувал да се врати во Сирија.
„Мислевме дека никогаш нема да се вратиме“, рече тој. „Но кога дојде можност, бевме многу среќни. Се враќам во мојата земја со првиот авион, чувствувам како да сонувам.“
Авионот на „Туркиш ерлајнс“, кој тргна од аеродромот во Истанбул во 09:00 часот по Гринич, се очекува да слета на Меѓународниот аеродром во Дамаск по краток двочасовен лет.
Извор: Anadolu Agency (AA)
