Универзитетскиот професор Орце Симов вечерва во емисијата „Бизнис21“ на ТВ21 истакна дека во делот на регулацијата на криптовалутите, мора да ги следиме примерите на развиените земји, а како пример ги даде САД.
„Тие уште во 2013 година ги препознаа како виртуелни пари и во нивниот систем веќе тие криптовалути се третирани со термин виртуелни пари. Ние треба да ги следиме нивните примери, едноставно да го земеме начинот како таму е регулирано и со некои минимални измени да го прилагодиме на нашите услови“, вели Симов.
Во однос на перењето црни пари, Симов вели дека трансакциите од адреса на адреса во крипто светот се запишани во отворена база на податоци која ја поседуваат сите корисници.
„Таму можат да се видат сите трансакции што се случувале од почетокот на функционирање на одредена криптовалута па до сега“, вели Симов.
Како што вели, постои можност органите да видат тие крипто средства на која адреса се наоѓаат и од каде потекнуваат.
ИЗВОР: ТВ 21
