Речиси се е подготвено за првите два километри од автопатот Блаце-Скопје, но не се отвора бидејќи не води никаде. Автопатот не може да се поврзе со постоечкиот пат поради значителната разлика во нивото меѓу нив.
„Ова е точката каде што завршува вториот километар од првиот сегмент на автопатот Блаце кон Скопје, а состојбата е ваква веќе 6 години. На теренот се само два булдожера, кои ја израмнуваат земјата, додека еден многу мал тим работи на другата страна во текот на денот кога времето е добро, иако рокот за пуштање не беше испочитуван два или три пати откако требаше да се исече лентата за овие 2 километри“, вели репортерот на ТВ21.
Проблем е и експропријацијата на земјиштето од жителите на Блаце. Иако изградбата започна во 2019 година, дел од жителите велат дека сè уште го бараат правото за компензација на земјиштето во Управниот суд. Не се задоволни со вреднувањето од 4 евра за квадрат, бидејќи им ветиле 50 евра.
„Не, не сме задоволни од оваа цена бидејќи кутија цигари денес чини 4 евра, како да дадеме на метар квадрат земја колку една кутија цигари. Ова е апсурдно, ова не се случува никаде во светот. Државата може со сила да го земе земјиштето, но ние никогаш не потпишуваме со свои раце. Немаме земја за дарување! Кога Бујар Османи ни вети дека ќе се плаќа по 10-50 евра, ние прифативме, но тоа беше измама“, вели Зелќиф Барди.
Од Министерството за транспорт и врски велат дека овој сегмент е во завршна фаза, но интензивно се работи и на надминување на имотно-правните спорови. Заменик министерката Калтрина Зеколи рече дека овој сегмент од 2 километри од почетокот до денес чинел 24 милиони евра.
„Ќе почнам со експропријација, бидејќи тоа е проблем кој се среќава во секој сегмент, тоа е многу сериозно прашање, ова го забележав и откако излегов и сама на терен, каде што видов дека на секое место не се работеше само поради оваа постапка. Морам да нагласам дека се преземени мерки во оваа насока и значително е намален бројот на постапки за експропријација, тоа се однесува на првите 2 километри од познатиот и многу фреквентен пат од страна на граѓаните, Скопје-Блаце“, вели Калтрина Зеколи.
Во меѓувреме, вториот сегмент од 10 километри со кои би бил ставен во функција автопатот Скопје-Блаце се уште е во фаза на комплетирање на документите за отворање на тендерот. Според проектирањето, 10 километри ќе чинат 240 милиони евра или 14 милиони евра за 1 километар. Изградбата на автопатот е ветена од 2002 година.
ИЗВОР: ТВ 21
