Во рамки на денешните активности, Собранието попладнево продолжи со разгледување и усвојување на повеќе важни законски предлози и финансиски планови. Во трето читање беше усвоен Законот за изменување и дополнување на Законот за заштита на децата, откако претходно пратениците ги одобрија сите шест амандмани, поднесени од ВМРО-ДПМНЕ и ЗНАМ.
Без дебата беше завршена општата расправа за Предлог-законот за изменување на Законот за спречување и заштита од насилство врз жените и семејното насилство, како и за Предлог-законот за изменување на Законот за еднакви можности на жените и мажите. Двата предлога беа усвоени во прво читање, со заклучок дека се прифатливи за понатамошна обработка во Комисијата за еднакви можности и Законодавно-правната комисија.
Исто така, беше одобрен Финансискиот план на Агенцијата за супервизија на осигурување за 2025 година, како и Годишната програма за работа и развој на Агенцијата за цивилно воздухопловство за 2025 година. Во второ читање беа усвоени и одлуките за Годишниот финансиски план на истата агенција, а за гласањето пратениците ќе бидат дополнително известени.
Собранието ќе гласа и за измените на Финансиските планови на Македонската радио-телевизија (МРТ) за 2024 и 2025 година, кои вклучуваат дополнување и пренамена на средства.
Пратеникот Митко Трајчулевски од СДСМ реагираше на Финансискиот план за МРТ за 2024 година, истакнувајќи дека усвојувањето на план за веќе измината буџетска година претставува прекршување на законот.
-Вака донесената одлука за давање согласност за веќе измината година е прекршување на законот. Самата одлука би била спорна и доколку биде оспорена, може да предизвика дополнителни негативни последици, рече Трајчулевски.
Потпретседателката на Собранието Весна Бендевска ја прекина 31-та седница, а продолжението е закажано за утре во 13 часот.
ИЗВОР: ТВ 21
