Две години откако е поднесена кривичната пријава до Цементарница „Титан УСЈЕ„ за значително аерозагадување, предметот и понатаму се наоѓа во предистражна постапка.
Инспекторатот за животна средина пред само 10 дена го доставил својот одговор до Основното јавно обвинителство за тврдењата на Град Скопје дека “Титан УСЈЕ“ загадува со ПМ10 честици и азотни оксиди. Инспекторатот пак, тврди дека тие непосредно пред Нова година добиле барање од ОЈО да излезат на терен.
– Во однос на постапката по поднесена пријава против цементарницата „Титан УСЈЕ„ надлежниот јавен обвинител постапува за проверка на наводите, при што презема повеќе дејствија. Пред 10-тина дена до обвинителството е доставен одговор од Државниот инспекторат за животна средина во врска со поднесено барање, а се прибираат и вербални искази. По целосно испитување на настанот, ќе биде донесена јавнообвинителска одлука. – Основно јавно обвинителство.
Кривични дела против животната средина ретко се процесираат како итни, велат правните експерти, додавајќи дека доколку надлежните сами не одлучат да дадат приоритет, делата можат и со години да се наоѓаат во предистражна постапка за која нема ограничување колку може да трае.
Во меѓувреме, Македонија се соочува со здравствена криза предизвикана од аерозагадувањето –-според Еуроњуз, државата го зазема првото место во Европа по смртни случаи предизвикани од аерозагадувањето, 1 од 9 бебиња во Македонија умира како директна последица од нездравиот воздух, велат од УНИЦЕФ а на годишно ниво според Светска Банка, Македонија губи скоро 4000 граѓани од загаден воздух.
Сепак, според мерењата кои ги спроведува министерството за животна средина, кај скоро ниту едно од најголемите загадувачи како сулфур диоксид, азотни оксиди, амонијак, јаглерод моноксид и слично, не се детектирани годишни вредности кои му наштетуваат на човековото здравје.
– Разликата во нашите мерења и светските е причината поради која има различни резултати, вели Беса Татеши од Министерството за животна средина во гостување во ТВ24 во ноември 2024. – Министерство за животна средина.
Според годишниот извештај на Основното јавно обвинителство, бројот на поднесени кривични пријави за дела против животната средина и природата во 2023 бележи намалување. Сепак, во текот на зимата повеќе градови низ Македонија како Скопје, Тетово, Струмица и Кичево, според швајцарската IQ Air, беа означени како населени места со воздух нездрав за дишење.
Извор: 24vesti.mk
