КУДС (ЕРУСАЛИМ) (АА) – Израел потпиша два договори со локална компанија за купување оружје, вклучително и илјадници тешки бомби, поради геноцидната војна на Тел Авив врз Појасот Газа, пренесува Анадолу.
Во денешното соопштение израелското Министерство за одбрана истакна дека двата договори со „Елбит Системи“ се со вредност од речиси 1 милијарда шекели (276 милиони долари).
„Елбит Системи“ е најголемиот израелски производител во воената индустрија, произведувајќи 85 отсто од копнената опрема на армијата и 85 отсто од беспилотните летала што ги користат нејзините воздушни сили.
Според првиот договор, „Елбит системи“ ќе произведе за Министерството за одбрана илјадници тешки бомби, се вели во соопштението.
Вториот договор вклучува формирање на „национална фабрика (…) за производство на суровини кои претходно биле набавени првенствено од странство пред војната“, се додава.
Новиот капацитет ќе има напредни производни линии за активни материјали што ги користи израелската одбранбена индустрија, соопшти Министерството.
Според израелските медиуми, армијата фрлила огромен број бомби врз Газа од почетокот на нејзината геноцидна војна на 7 октомври 2023 година.
Израел продолжува со геноцидната војна врз Појасот Газа и покрај резолуцијата на Советот за безбедност на Обединетите нации која повикува на итен прекин на огнот, по нападот на Хамас на 7 октомври 2023 година.
Во ноември минатата година, Меѓународниот кривичен суд (МКС) издаде налози за апсење на израелскиот премиер Бенјамин Нетанјаху и поранешниот министер за одбрана Јоав Галант за воени злосторства и злосторства против човештвото во Газа.
Израел се соочува и со случај за геноцид пред Меѓународниот суд на правдата за неговите постапки во Газа.
Извор: Anadolu Agency (AA)
