Тридневна жалост во Црна Гора по масакрот во Цетиње на стартот од 2025 година. Осомничениот, Ацо Мартиновиќ, се самоуби откако претходно уби најмалку дванаесет лица. Меѓу жртвите две деца на возраст од 10 и 13 години а во крвавиот поход настрадале и најблиски пријатели, кумови и роднини на убиецот.
45-годишниот Мартиновиќ, избегал веднаш по нападот, а полицијата подоцна го пронашла во објект недалеку од куќата каде што живеел. По неколкуи часа преговори, убиецот одлучил си го одземе животот.
„Полицијата направи прстен околу него. На наредба да го спушти оружјето, си пукаше во главата. При обидот да го пренесеме во болница, им подлегна на повредите. Осомничениот имал одредени прекини во комуникацијата со роднините и пријателите, а можам да потврдам и дека сите загинати биле негови кумови, пријатели, другари со кои поминувал време. Мотивот за овој чин се уште не е познат.“ – Лазар Шќепановиќ директор на полициската управа на Црна Гора.
Убиствата почнале во ресторан во близина на Спортскиот центар во Цетиње каде избила тепачка меѓу убиецот и гостин. Непосредно после инцидентот, Мартиновиќ отишол дома, земал пиштол, се вратил во кафеаната и убил четири лица. На друга локација потоа ги застрелал и членовите на неговото семејство како и двете деца. Здравствените власти предупредуваат дека бројот на загинати може да се зголеми. Во болница, со тешки повреди, примени се четири лица.
„Сите четворица ранети се оперирани синоќа. Сите се наоѓаат на одделот за интензивна нега, нивните повреди се сериозни, но виталните параметри моментално се стабилни.“ – Александар Радовиќ директор на Клиничкиот центар во Подгорица.
По последните убиствата, црногораскиот премиер побара промена на законите и построга контрола за тоа кој смее да поседува оружје. За утре свикана вонредна седница на Советот за национална безбедност каде според најавите, ќе се разговара за воведување итни мерки за откривање и конфискација на нелегално оружје, јакнење на безбедносните институции и подготовка на нов Закон за оружје со построги контроли за издавање дозволи.
Во август 2022 година, исто така во Цетиње, вооружен напаѓач застрелал десет луѓе пред да биде убиен.
„Треба да се запрашаме кој може да има оружје во Црна Гора, мора да се заострат критериумите и казните.“ – Милојко Спајиќ премиер на Црна Гора.
Во Цетиње, улиците празни а знамињата на половина копје. Жителите во шок по убиствата кои се случија во нивниот град.
„Не можеме да се опоравиме. Не на ваков начин. Можеме да бидеме подобри само ако сме сите заедно. “
„Ужасна трагедија. Никогаш нема да се опоравиме од убиствата кои се случија. Не е ова Париз, ова е Цетиње. “
„Првин ја имавме катастрофата пред две ипол години а сега и ова. Им дозволуваат на луѓе да чуваат оружје, а кои не смеат да имаат оружје.“
По страшната трагедија во Цетиње, во Црна Гора прогласени денови на жалост. Сите празнични настани и концерти се откажани ширум земјата, а пораки со сочуство пристигнуваат од целиот регион.
Извор: 24vesti.mk
