Архитектите Методи Хаџи-Андов, Сашо Андријевски, Игор Сугарчев и Димитар Стефановски од проектантското биро „Параметар студио“, се добитници на Големата годишна награда за најуспешно реализирано архитектонско дело во 2024. Наградата им ја врачи претседателката Гордана Сиљановска-Давкова за проектот Мултинаменски комплекс во Општина Петровец, Скопје.
Големата годишна награда традиционално ја доделува Асоцијацијата на архитекти на Македонија, под покровителство на претседателот на државата.
„За мене, вие, архитектите сте креативците кои го одбележуваат духот, традицијата, трендот и влегуваат во историјата, во епохата, па и во милениумите и стануваат дел од националната, регионалната, но и светската културна ризница. Јас верувам дека тоа воопшто не е мала или едноставна работа и дека е симбиоза, спој на многу елементи. Поставувавјќи ја дилемата каде е местото денес на македонскиот архитект, вашето место, дел од одговорите можеме да ги најдеме во творештвото на денешните добитници. Оваа награда, верувам дека, не само што е вивисекција на вашите архитектонскит остварувањеа во период од една година, што секако е кус период за дефинитивен став или критика, но е сигурно индикатор за да видиме каде сме успешни, кои се трендовите, какви сме во однос на другите, а тоа вие самите самоктирично ги проценувате. И да не заборавиме, македонската архитектура има длабоки темели и може да се пофали со градби кои се дел и од светското наследство, рече Сиљановска-Давкова и додаде:
„Јас, пак, би сакала да се навратам на еден архитект којшто го познавам, и кога врвам по Орце Николов сакам да ја видам неговата куќа, зборовите на уважениот професор Борис Чипан: ‘Архитектурата е сè заедно. Познавање и живеење на животот. Магија на хуманистичката алхемија. Потрага по каменот на мудроста. Напор да се открие досега неоткриеното. Архитектурата се раѓа и се создава’. Ви посакувам градителски потфати. Себе и на сите, посакувам да ги спасиме, можеби сѐ уште имаме време, оние прекрасни куќи што ги гледам на некои места, и се плашам дека ќе исчезнат утре“, рече Сиљановска-Давкова.
ИЗВОР: sdk.mk
