Охрид е целосно резервиран за прославата на Нова година. Во приватното сместување веќе се бара место повеќе, одлична исполнетост имаат и хотелите на ривиерата. Цената за ноќевања се движи од 60 до 100 евра од ноќ зависно од локацијата на објектот.
Прославата во ресторан чини од 50 до 80 евра, угостителите нудат најчесто празнично мени со жива музика. Хотелите пак нудат празнични пакети кои вклучуваат дочек со жива музика, со две или три ноќевања и полн пансион. Цените се движат од 200 до 400 евра по лице.
Иако дел од граѓаните веќе коментираат дека Охрид е прескап и оваа празнична сезона, хотелските менаџери сметаат дека како дестинација во регионов е најефтин и затоа се исполнети капацитетите. Од фелата пак велат нема високи цени,туку што добивате за тоа што го плаќате.
Најчести гости и оваа година ќе бидат соседите.Според хотелиерите понудата оваа година е одлична а за тоа говори зголемениот интерес од страна на туристите. Освен во локалите долж ривиерата, градот организира прослава на градскиот плоштад. Новата година туристите и охриѓани ќе ја дочекаат со поп дивата Каролина Гочева македонската фолк звезда Наум Петрески, миленикот на младата публика охриѓанецот Пајак како и многу други музичари и артисти.
Градот е украсен и осветлен со реквизити од минатите години, а дополнително беа одвоени околу 23.000 евра за набавка на нови со што се надополни новогодишниот празничен изглед. По теркот на европските метрополи годинава на двата охридски плоштади има и новогодишни базари за посетителите.
Извор: 24vesti.mk
